SHILLONG: Re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susana gita Congress dol, gital aro dambekalgipa candidate-rango ka·dongchakbatengani gimin tikitrangkoba iandakgipa candidate-rangna on·batenga.
Iani bidingo kobor ra·timgiparangna u·iatengon, KHADC aro JHADC election-na block aro district committee-rangni recommend ka·atenggipa candidate-rangara, kamni gimin ma·sigipa, gital aro dambe candidate-rang ong·batenga ine Meghalaya Pradesh Congress Committee (MPCC)-ni president Vincent H Pala parakataha.
Congress dolni gittamgipa candidate list-ko re·baenggipa January 16 tariko parakatgen ineba Pala aganaha.
Dilgiparangko wata katanichi Congress dol bilgriroroatako man·engama ine sing·anina aganchakaniko on·angengon, ian Congress dolko dal·rorona cholko on·ani gitasa ong·enga ine Pala aganaha.
“Chingni MLA aro MDC-rangko NPP ra·e katahaoba chinga kakketna, manderangna aro chingni niksamsoanirangna on·kangahani gimin chinga bilakbatskaaha,” ine MPCC president aganaha.
An·tangtangni man·gnina wate katgipa dilgiparangko manderang ma·simanaha aro bang·batan da·o Congress dolona re·bapilaha ineba ua aganaha.
“Ian Congress dolna bilakrorona gita chol ong·a ine anga ka·dongen aganna man·gen,” ine Pala aganaha.
Sixth Schedule aro dingtang dingtang nangchakegipa bill-rangko taridapanio Congress dolni on·gilanirangko ma·sie manderang, Congress dolko seokgen ineba ua an·tangni ka·dongchakenganiko parakataha.
Indake ong·engon, Tribal manderangni daka rikanirangko ra·dona, chel·chakna aro ripingna gita niamrangko ra·gatna nangenga ine Congress dolni dilgipa aro KHADC-ni MDC Pynshngain N Syiem parakatskaaha.
District council-ko bilakbatatna gita dingtang dingtang cholrang donga ine janapatengon, District council-rangni tangka paisani gita neng·nikanirangko aro dingtang dingtang neng·nikanirangko namatna nangengani gimin Syiem janapataha.
