TURA: Sombar salo gital kuligipa Captain Williamson Sangma State University-o gipin jatrang gitan A·chikrangnaba apsan daken kamrangko on·china didie, Garo Hills-ni A·chik Research Scholars Association (ARSA), a·dokni Chief Minister Conrad Sangma-na memorandum-ko on·ataha.
Ia memorandum-o, A·chikrangnaba gipin jatrang gitan skigipani aro gipin kamrangko on·china Chief Minister-ko didiatengon, a·dokni Job Reservation Policy-o pangchake ia Capt Williamson Sangma State University-o A·chik candidate-rangnaba kamrangko tikatchina ARSA mol·molataha.
Kamrang dongani kri, A·chikrangnaba ia State University-o kamrangko tikatchina gita ARSA, a·dokni Chief Minister-ko mol·molataha.
Ia gital State University-o kamrangko on·anio aro kamoni neng·takatengon, Union Grants Commission (UGC)-ni niamrangko ja·rikchina aro bilsini kri kamoni neng·takatchina ARSA didiataha.
“UGC-ni dongimin niamrangko ja·rikanichi, pilak candidate-rangan dingtang dingtang kamrangna dorgastorangko galpana chol man·gen,” ine ARSA, Chief Minister-na sedoatgipa chittio parakataha.
Indake ong·engon, ia gital Capt Williamson Sangma State University-o Anthropology, Folklore studies, Women studies, Public Administration, Nano Science, Information Technology, Sociology, Philosophy aro uandakgipa department-rangko kulichina gitaba ARSA, a·dokni Chief Minister-ko mol·molataha.
