TURA: West Garo Hills a·jani Selsella jolrango songdongenggipa manderangni namgnina, ia joloba 5G internet-ko on·na man·na gita dingtangmancha tower-ko songchina Selsella jolo donggipa dingtang dingtang NGO-rang, chong·motan FKGJP, ASWA, GSU, ADE, ANYO, GSMC, ACHIK, aro NGCO dolrang, West Garo Hills a·jani Deputy Commissioner-ko didiataha.
Iani bidingo West Garo Hills a·jani Deputy Commissioner-na seachi u·iatengon, ia chasongara ta·rakbee dal·roroenggipa technology-ni somoisa ong·engani gimin ta·rakgipa internet-ko man·aniara, jolo songdongenggipa manderangna mingsa nangchongmotgipa cholan ong·a aro sorkarini dilanichi India a·songba a·gilsako dilgipa ong·na re·mikkangengon, Selsella gita dakgipa biaprangoba namgipa technology-ko nangchongmotengaha ine NGO-rang parakataha.
Selsella-o 5G internet-ko songanichi namgnirangko man·ani bidingo janapatengon, 5G internet-ara ta·rakgipa ong·ani gimin dingtang dingtang nangchongmota kamrangko ka·anio Selsella-ni manderangna namgniko on·gen aro skulrango poraienggipa bi·sarangnaba online gita skie ra·anio aro dingtang dingtang online education material-rangko ra·na dakchakani ong·gen ine NGO-rang parakataha.
Selsella-o 5G internet-ko on·anichi, bading chiwalgiparangni kamrango, sanna banani kamrango, aro rang·gitik a·sel ong·ani somoirango u·iatsamsoanirangko ra·na dakchakani ong·gen ineba Selsella-ni NGO-rang parakataha.
Selsella-o 5G internet-ko a·bachengatna man·na gita Jio, Airtel aro uandakgipa company-rang baksa ta·raken agangrikchina gitaba NGO-rang, Telecom department-ko mol·molataha.