AMPATI: South West Garo Hills a·jao skanggipa changna, Community Managed Training Centre (CMTC) ba joltangtango songdongenggipa manderangchi chalaigipa training centre-ko SWGH a·jani Deputy Commissioner Hema Nayak, Betasing C&RD Block ning·o donggipa Godalgre songo nokdonggae on·angaha aro ia CMTC-ko nokdonggae on·anio, SWGH a·jani ADC RZD Shira, Betasing Block-ni BDO Crystal Ripamchi N Sangma, Godalgre songni Nokma aro dingtang dingtang self help group (SHG)-rangba bak ra·angtokaha.
Ia CMTC-ara Unity Cluster Level Federation Women SHG Members Multipurpose Co-operative Society Ltd-ni ong·a aro ia training centre-ko chalaianio, ia dolna Meghalaya State Rural Livelihoods Society (MSRLS) dakchake on·enga.
Ia training centre-ko nokdonggae on·anganio SWGH a·jani Deputy Commissioner, jinmana aganprakengon, a·jao namgipa training centre-rang dongna nangani gimin janapangenba, ia CMTC-ko manderangni aro mongsongbate chadamberangni changa sapanirangko namdapatna jakkalchina didiangaha.
Competitive exam-rangna tarisamsona man·na gita ia training centre-o chadamberangna computer-rangko skie on·china gitaba Nayak, ku·pattianiko on·angaha.
Ia CMTC-o sak 30 manderangko asongatna biaprang donga aro iano training hall damgni, dormitory ge·sa, dining room, skie on·gipa manderangna guest room aro kam ka·giparangna office-ba donga.