SHILLONG: Politics-ko toromni kamrango nangatanichi, Voice of the People’s Party (VPP), Bharatiya Janata Party (BJP)-ni bewalo kamrangko ka·enga ine Meghalaya Pradesh Congress Committee (MPCC)-ni president Vincent H Pala matnangataha.
Pala-ni aganani gitade, election-na campaign ka·engmiting somoirango VPP-ni dilgiparang, toromko jakkalna jotton ka·engachim.
“Toromko politics baksa nangatode kenchakna nanganirang donga maina VPP, election-na campaign ka·engmitingo pangnan toromko jakkalna jotton ka·enga. Pakistan, Hamas aro Seria-oba uamang politics-ko torom baksa nangataha indiba je manderangan politics-o toromko jakkalna jotton ka·a, uamangde chu·sokna gita man·rongja,” ine Pala aganaha.
Re·baenggipa February 21 tariko ong·atenggipa KHADC aro JHADC election-na sak 18 candidate-rangko parakna tom·aniko ong·atengmiting somoio ia kattarangko MPCC-ni president aganaha.
Meghalaya a·dokode Kristianrang baksana Hindu aro gipin toromni manderangba songdong a·chaengani gimin politics-ko toromo nangatna nangja ineba ua aganaha.
“VPP-ni election-na campaign ka·anirango dongpaode gilja nokrango skipraka gita daknikpilgen. Meghalaya a·dokode Kristianrangsan ong·ja indiba gipin toromni manderangba dongpaani gimin maikai politics-ko toromo nangatna man·a?” ine Pala sing·doangaha.
Pala-ni aganani gitade, BJP dolba toromko jakkale, a·songko bak dakna jotton ka·gipa dol ong·ani gimin VPP-ni kamrangba BJP gitan apsanangaia.
Toromko politics-o nangatjachina didiangengon, a·dokni manderang, VPP-ni chalakkiko ka·sinsin ma·sibatokengaha ine MPCC-ni president matnangataha.
“VPP-ni kattarang, uamangni kamrang baksa meligrikja ine manderang nikna a·bachengengaha,” ine Pala aganaha.
