SHILLONG: Hynniewtrep National Liberation Council (HNLC) bobil dolni pilak case-rangkon kema watchina dabianio chu·sokna man·jae, a·dok aro ma·mong sorkari baksa agangrikaniko ra·pilahaoba da·o changsataie, HNLC bobil dolni dilgiparangko tom·tomanina agangrikaniona re·bapilchina a·dok sorkari okamataha.
A·songni niam bidiko pangchake HNLC bobil dol baksa agangrikna nangenganiko a·dokni Chief Minister Conrad K Sangma janapatenba, a·dokni tom·tomanina aro namroro silroroanina HNLC bobil dol baksa agangrikaniko chu·sokgipa ong·atna sorkarini nangnikenganiko parakataha.
“Chinga HNLC bobil dol baksa agangrikaniko a·bachengatpiltaina aro dolgni agangrikanio maiba neng·nikanirang donggenchimoba, uarangko namatna nangnikenga,” ine Sangma aganenba, HNLC bobil dolko sorkari baksa agangrikaniona re·bapilchina didiataha.
HNLC bobil dolni case-rangko kema ka·china dabienggipani bidingo janapatengon, iandakgipa kamrangde a·dok sorkarini jako ong·ja indiba ma·mong sorkarini jakosa ong·a ine Chief Minister parakataha.
HNLC bobil dolni case-rangko, mongsongbate ka·namgijagipa case-rang pilakkon sorkari nipilenba kema ka·na kusi ong·aigen ineba Chief Minister parakataha.
“Indiba ia pilakan a·songni niam bidiko pangchake agangrikanisa ong·na nanggen. Sorkari baksa agangrikanio chinga uamangna (HNLC) naljokgipa ramarangko on·naba ku·rachakenga aro uamangni case-rangko kema ka·ani giminba agangrikanichisa dakna man·gen,” ine Sangma aganaha.
HNLC bobil dol baksa agangrikanio dingtang dingtang ra·bianirangde dongaigen ine janapatengon, bobil dol baksa agangrikanichi a·dokna tom·tomani aro namroro silroroaniko ra·bana man·chongmotgen ine Chief Minister parakataha.
