TURA: 2023-2024 bilsini scholarship-ko da·onan man·tokkujaengani a·sel chatro chatrirang neng·nikanirangko chagrongna nangtokenga ine Garoland State Movement Committee (GSMC) parakatenba, ia scholarship-ko ta·raken chatro chatrirangna on·china a·dokni Education Minister Rakkam A Sangma-ko didiataha.
“Lekka porako aro chatro chatrirangni namgnina pangnan Meghalaya sorkari, skanggipa ong·e daitoko donenba kam ka·enga ine chinga ma·sia indiba 2023-2024 bilsini scholarship-ko on·chipkujaengani a·sel chatro chatrirang neng·nikanirangko chagrongna nangtokengaha,” ine Education Minister-na sedoatgipa chittio, GSMC-ni dilgiparang parakatenba, ia scholarship-ko ta·raken chatro chatrirangna on·china didiataha.
Chatro chatrirangara mikkangchi a·dokko dilnagiparang ong·e, bang·bata chatro chatrirangan an·tangtangni lekka porana scholarship-rango pangchakgiparangsa ong·a ine janapatengon, ia scholarship-rangara chatro chatrirangna tangka paisani gita dakchakanisan ong·ja indiba ian chatro chatrirangna, an·tangtangni janggi tanganio chu·sokgipa ong·na dakchakaniba ong·a ine GSMC parakataha.
“Scholarship gride cholgri ong·pagipa chatro chatrirangde, an·tangtangni poraianirangko dontongna draatako man·a,” ine GSMC parakataha.
2023-2024 bilsini scholarship-rangko on·anio ja·manchakenganiara chatro chatrirangnasan ong·aigija, uamangni nokdangrangnaba nangchakeaniko ra·baenga ine janapatskaengon, ma·a paarangba an·tangtangni dedrangna lekka porako on·anio scholarship-rangon pangchakbatani gimin scholarship-ko ta·raken on·na nangchongmota ine GSMC parakataha.
