SHILLONG: A·dokko namroro silroroatna ja·ku de·engon, 2025 bilsio a·dok sorkarini chu·sokatna man·chisogimin kamrangko a·dokni Chief Minister Conrad K Sangma parakataha aro ia kamrangoni mongsonggipara, Umroi airport-ko dal·batatani, medical college-rangko kuliani, Mawdiangdiang-o gital Secretariat-ko rikani aro mongsonggipa rama tarianirangen ong·enga.
Umroi airport-ko dal·batatani bidingo janapatengon, ia airport-oni dal·dalgipa sildorengrangko ta·rake watanian uni mongsonggipa bak ong·gen aro iani bidingo ua Delhi songjinmaona re·angenba, ma·mong sorkari baksa agangrikna miksongenga ine Conrad u·iataha.
Umroi airport-ko dal·batatna krenganio ma·mong sorkariba pilak nanga dakchakanirangko on·engani gimin ia airport-oni ru·utgijan dal·dalgipa sildorengrangni bilchakataniko nikna ka·dongenga ine ua agankuaha.
Una agre, Shillong aro Tura-o Medical College-rangko man·a dipet ia bilsini gisepon kulina miksongenga ine janapatengon, Shillong Medical College-ko ia 2025 bilsini September jaon class-rangko a·bachengnaba gnang aro Tura Medical College-koba man·a dipet ta·raken matchotatna sorkari ja·ku de·enga ine CM agandapaha.
Tura Medical College-ko rikani bidingo talataniko on·angengon, kamrang bewalan ta·rakengoba dingtang dingtang neng·nikanirangko chagrongna nangenga indiba man·a dipet kamrangko ta·raken matchotatna sorkari jotton ka·enga ine Conrad aganaha.
Mawdiangdiang-o gital Secretariat-ko rikani bidingo janapatskaengon, re·baenggipa January 21 tariko, Meghalaya Day-ko maniani salon Mawdiangdiang-o gital secretariat-ko rikna pangchakaniko songgnok aro mitam office-rangko ia biapona apjitbasona man·na gita bilsignini gisepon mitam block-rangko ia biapo matchotna ka·dongenga ine Chief Minister parakataha.
Una agre, Tura, Jowai aro Pynursla-o bakan Mini Secretariat-ko rikgen ineba Chief Minister parakataha.
Minggipin, a·dokni mongsonggipa ramarangko tariani bidingo janapatskaengon, Umiam aro Ratacherra gita Assam-ona tariangna sienggipa ramana ua namen kusi ong·soenga ine Chief Minister parakataha.
Chief Minister-ni u·iatani gitade, ian gong kror 24,000-ni project ong·a aro ian Meghalaya a·doko aro salgro salaram jol gimikoba dal·batsranggipa road project ong·naba gnang.
Shillong songjinmao ramarangni apchangket ong·aniko namatna gita sorkari, dingtang ramarangko tarina miksongenga ineba CM agankuaha.
