SHILLONG: Shillong songjinmani Barik Point-o feet 131 chue songdogipa a·songni nisanko gin·ani gimin ra·onpilna nangaha.
Ia a·songni nisanko re·anggipa 2024 bilsini September 3 tariko, a·dokni Chief Minister Conrad K Sangma, Barik Point-ni PWD complex-o songahachim aro ia nisan da·o jabri ong·ahachim.
Indake ong·genchimoba, ia nisanni tangsekgipa bako, balwachi gin·atako man·ahani gimin ia nisanko official-rang ra·galpilna nangao ga·akaha.
India-ni Flag Code-o pangchake, a·songo gin·gipa flag ba nisanrangko songna man·ja aro ia nisanrangko taripilani ja·mansa songdopiltaina man·a.
Ia nisanni bakroaniara metre 40 ong·a aro chuaniara feet 130 ong·e da·o dipet Meghalaya a·doko chubatsranggipa nisan ong·engachim. Ia Barik point-ko ‘Unity Park’ dakeba taridapna siengachim aro ia biapko taridapanio, Pedestrian Plaza, Open ground, Stepped Plaza, Civil Hospital-oni ja·achi re·enggipa manderangna rama, Taxi terminal, parking, Drop off court, bi·sarangna kal·chakani gnang restaurant, workshop area, garirang napani aro ong·katanirang dongna siengachim.
