SHILLONG: Meghalaya a·dokona niam gri napsrukanirangko champengsona Inner Line Permit (ILP) gita dakgipa rakgipa niamrangko ra·gatchina dingtang dingtang dolrang dabitokengon, Khasi aro Jaintia Hills a·jarangonaba rel garirangko ra·bana man·na gita a·dok sorkari, Inner Line Permit (ILP)-ko man·na krengenga ine a·dokni Chief Minister Conrad K Sangma parakataha.
Iani bidingo sing·anina aganchakaniko on·angengon, “Meghalaya a·doko ILP-ko man·genchimode rel garirangko ra·baanio chu·sokgipa ong·naba gnang ine chinga chanchirimenga aro iani giminsa a·doko ILP-ko ra·gatchina dabina chinga Assembly-o resolution-koba pass ka·aha,” ine Sangma aganaha.\
Da·o dipet Meghalaya a·doko ILP-na Assembly-o resolution-ko pass ka·gipade NPP-chi dilenggipa MDA sorkarisan ong·engkua ineba ua aganaha.
“Ian chingni ILP-na dabianio chakpaaniko mesokani ong·a,” ine Sangma aganaha.
ILP-ko ra·gate on·anide ma·mong sorkarini jakosa ine talataniko on·angengon, “Chinga iani bidingo sorkarini gita dabiangkuna man·a indiba iani bidingo anga mamingkoba ku·rachaknade man·jawa,” ine Chief Minister parakataha.
ILP-ko man·genchimode rel garirangko ra·bana man·naba gnang ine agananiko ra·chakangengon, “Iani giminsa chinga ILP-ko man·e on·na krengenga maina iachin an·ching dingtang dingtang nanganirangkoba chu·sokatna man·gen indiba ILP-ko ra·gatanichi a·dokni tourism-na maming nangchakeani dongjachina chinga kamko ka·gen,” ine Sangma aganaha.
“Meghalaya a·doko tourism-o pangchake janggi tangenggipa manderang bang·a, uni gimin ILP-ko ra·gatanichi tourist-rangni re·baaniko aro tourism-ni kamrango nangchakeanirang dongjana gita nanggen,” ine Chief Minister aganaha.
Khasi Hills-ona rel garirangko ra·baani bidingo ua Union Railway Minister-ko New Delhi-o gronge agangrikgen ineba Chief Minister parakataha.
