TURA: Nokma Council-ni chang 20-gipa annual conference ba bilsini tom·bimonganiko re·anggipa Sonibar salo, East Garo Hills a·jani Mangsang songo ong·atangaha aro ia tom·bimonganio Garo Hills gimikni Nokmarang, re·bae bak ra·angtokaha.
Ia tom·bimonganio Nokmarangni chagrongna nangenggipa dingtang dingtang neng·nikanirangko namatna gita chanchirimangaha aro Nokmarangni dingtang dingtang nanganirang, jekai songo noko kacharirangko rikna nangani, gipin biaprangoni sokgiparangko sokachakna biapko rikani, bazar antirango kajinarangko gilani aro uandakgipa kamrangni giminba chanchirimangaha.
Ia sal somoirango, badiaba badiaba biaprango Nokmarangni maming permission ba No Objection Certificate (NOC) gri, a·ana lottery ba chitti kal·atanirangko nikna man·engani gimin Nokmani NOC gri songni nokni a·ana lottery-rangko kal·atna man·jawa ineba ia tom·anio Nokma Council tik ka·angaha.
Ia tom·bimonganiko ong·atanio, Rongjeng-ni MLA aro Forest Development Corporation-ni Chairman Jim M Sangma, mongsonggipa sokgipa ong·e jinmana aganprakangengon, ia tom·bimonganiko Mangsang songo ong·atahani gimin Nokma Council-ko mittelpilangenba, Nokmarangni dingtang dingtang dakna nanggni kamrangni gimin janapangaha.
Ia tom·anio, Darugre-ni MDC Henen R Sangma-ba dongpae jinmana aganprakangengon, A·chik a·songni namroro silroroanina an·tangtangna on·gimin bilrangko name jakkalchina aro niamo pangchake jatko dilchina Nokmarangko didiangaha.
