Rikman Momin-ko BJP-ni state president songpiltaia

SHILLONG: Skanggipa term-o dilgiparangni namnikaniko man·ahani gimin Bharatiya Janata Party (BJP) Meghalaya-ni state president Rikman G Momin-ko da·o gnigipa changna state president songpiltaiaha.
Momin-ko state president songpiltaina tik ka·ani gimin janapatengon, uni dilanichi Meghalaya a·doko BJP, bilakgipa ong·na man·aha ine BJP-ni dilgiparang parakataha.
Adita salrangni gisepon Autonomous District Council (ADC)-ni election-ko ong·atengani gimin aro Lok Sabha election-ba sepangengahani gimin kamrangko ka·dilna gita state president Rikman G Momin-o ka·donge gital term-ko una on·dapna tik ka·aha ineba BJP-ni dilgiparang parakataha.
Rikman Momin-ni state president dilanichi Meghalaya a·doko bang·en BJP-ona membor-rangko rimdapna man·aha aro mikkangchiba bang·en gital membor-rangko rimnapna ka·dongenga ineba BJP-ni dilgiparang parakataha.
Meghalaya a·doko an·tangko BJP-ni state president songpiltaiani ja·man kobor ra·timgipa manderang baksa agangrikengon, uo ka·donge ia kamko on·piltaiahani gimin Momin, BJP-ni dilgiparangko mittelpilangaha aro Meghalaya a·doko BJP-ko mangrakbatatna an·tangko on·kange kam ka·angkugen ine ku·rachakaniko on·angaha.
“Batanggimin term-o mitam membor-rang angni kamna kusi ong·jaengnaba gnang, uni gimin da·o an·ching pilan ku·mong nangrime party-na kam ka·skanaha. Ia party-de president-nisan ong·ja indiba pilaknin ong·a, uni gimin mikkangchi an·chingni a·dokko ra·dona an·ching ku·cholsan nangrimna,” ine Momin aganaha.
Momin-ko da·o Meghalaya BJP-ni state president songpiltaiahani gimin ua bilsi gittamna da·o state president-ni kamko jako ra·e ka·angkugen.
Indake ong·engon, Meghalaya a·doko BJP-ko mangrakbatatna gita a·dokni BJP Minister AL Hek, MLA Sanbor Shullai aro gitcham state president Ernest Mawrie-ko National Council membor dake seokangaha.