TURA: South Garo Hills a·jaoniko niam gri koela bikote dingtang dingtang biaprangona ra·angenga ine Congress dolni Karak R Sangma parakatenba, iani bidingo sandirokchina South Garo Hills a·jani Deputy Commissioner-na sedoataha.
Iana skangba, South Garo Hills a·jaoniko niam gri koela bikote Gasuapara Land Custom Station gita Bangladesh a·songona ra·angenga ine badi ka·anirangko man·ahani gimin iani bidingo sandirokna gita Meghalaya High Court ge·etaniko on·manahachim.
Indake ong·engon, Congress dolni Karak Sangma-ba apsan daken, re·anggipa January 16 tariko, South Garo Hills a·jani Deputy Commissioner-na badi ka·e sedoataha.
South Garo Hills a·jani Gare Gittim songoniko niam gri koelarangko bikotenga aro ia koelarangko Nongalbibra police station-ni ning·o donggipa Pathargittim-o chimongenga ine Deputy Commissioner-na sedoatgipa chittio Sangma parakataha.
Sangma-ni parakatani gitade, West Khasi Hills a·jani Goreng aro Rangram jolrangoba niam gri koelarangko bikotenga aro ia koelarangko Jadigittimo chimongskaengachim. Ia koelarangko, Coal India Limited depot-ni koelarang baksa niam gri salenga ineba ua parakataha.
Iani bidingo spot inquiry-ko dakchina South Garo Hills a·jani Deputy Commissioner-ko didiatengon, ia jolrango niam gri koela bikotaniko aro Assam a·dokona ra·anganiko ta·raken champengatchina Congress dolni dilgipa dabiangaha.
Koela salna on·gipa challan apsankon changni chang jakkalengani a·sel Meghalaya a·dokna kajina man·anio noksan ong·na nangenga ineba Sangma matnangataha.
