SHILLONG: East Khasi Hills a·jani mingsinggipa Mawphlang Sacred Grove-o Hima Mawphlang-ni office nokko Budbar salo, a·dokni Chief Minister Conrad K Sangma nokdonggae on·angaha.
Ia Hima Mawphlang-ni office nokko nokdonggae on·anganio, a·dokni Chief Minister, jinmana aganprakengon, Mawphlang Sacred Grove ba rongtalgipa buring bolgrimko ripinganio bilsi 1000-mang ong·pile Hima Mawphlang, ia biapko ripinge rakkina kam ka·ahaoba office nok dongkujani a·selo neng·nikanirangko chagrongna nangengachim indiba da·alo ia office nokko kulianichi, ian songni dilgiparangnasan ong·aigija, jolo songdongenggipa manderangnaba gisik ra·beani sal ong·gnok ine parakataha.
Mawphlang Sacred Grove jolo Tourism centre aro dingtang dingtang nokrangko rikna gita a·dok sorkari, Swadesh Darshan Scheme-ni ning·o gong crore 25 tangkarangko chamatenga ineba Chief Minister parakataha.
Hima Mawphlang-ara jolo songdongenggipa manderangni gamchatbegipa gam-jin gita ong·enga ine janapatengon, ian jatni daka rikani aro bimangko rakkigipa chin gita ong·enga aro ia office nokna pilak nanganirangko dakchake on·anggen ine Chief Minister ku·rachakaniko on·angaha.
Mawphlang Science & Commercial College-na dingtang dingtang kamrangko sanction ka·manaha aro ia college-o class-rangko ia bilsionin a·bachenggnok ineba Chief Minister parakataha.
Mawphlang Secondary School-na gong lak 1-ko aro Pynshailang Lyngdoh baksa uni dolna doka dam·ani bosturangko brena gita gong lak 1 tangkarangko on·gen ineba ia tom·anio Chief Minister parakataha.
Ia gamchatbetgipa Mawphlang Sacred Grove-ni bidingo see rakkichina aro a·gilsak gimiknan mesokatchinaba ua Hima Mawphlang-ko didiangaha.
