SHILLONG: Tura aro Shillong songjinmarangna chirangko on·enggipa Ganol aro Umiew chibisikrangko tangatpilna gita Germany-ni FfW Development Bank aro Meghalaya sorkarini tangka paisarangko dakchakanichi, ming 300-na baten externally aided project (EAP)-rangko ra·baenga.
Ia project-rangara, Tura songjinmana chiko on·enggipa Ganol chibisik aro Shillong songjinmana chiko on·enggipa Umiew chibisikko tangatpilna aro ripinge rakkina miksonge ra·gatgipa project-rang ong·enga.
Ia project-rangko ra·gatani bidingo kobor ra·timgiparangna talataniko on·angengon, “Ganol aro Umiew chibisikrangko tangatpilna gita sorkari, ia project-ko jako ra·aha. Ia project-ko da·o a·bachengataha aro iako MBMA jako ra·e ka·enga,” ine a·dokni PHE Minister Marcuise N Marak parakataha.
Adita salrangna skangsan ia project-ni kamrangko ua nipilangaha ineba Marak aganaha.
“Ia project-ni kamrang namen chu·sokenga aro ia project-o dingtang dingtang bakrang donga. Ia project-ni skanggipa bakrang, chong·motan songrango u·iatani program-rangkode a·bachengengaha,” ine ua aganaha.
Re·anggipa 2024 bilsini February jao, a·dokni Chief Minister Conrad K Sangma, Protection of Vulnerable Catchment Areas in Meghalaya (MegARISE)-ko oprake on·enba, Sustainable Land Management Meghalaya Project (SLM)-koba a·bachengate on·angahachim.
Gong kror 344 tangkarangko chamgipa Meg ARISE project-ara Meghalaya a·doko china dilaniko namatna aro chibisikrangko name rakkina ra·gatgipa project ong·achim.
A·doko ran·angenggipa dam 749 chibisikrangni gimin janapatengon, “Mongsonggipa chibisikrangko PHE department sandimanaha aro ia project-na detailed project report (DPR)-koba tarimane ia project-ko Soil & Water Conservation department jako ra·enga,” ine PHE Minister parakataha.