TURA: West Garo Hills a·jani a·kawe jolrango game ge·e cha·enggipa manderangni chagrongna nangenggipa dingtang dingtang neng·nikanirangko namatchina didie Bristibar salo, All Meghalaya Minority Students Union (AMMSU), West Garo Hills a·jani Deputy Commissioner-na sedoataha.
AMMSU-ni Deputy Commissioner-na sedoatgipa chittio parakatani gitade, ia sal somoirango gama ge·anirango jakkalna nangenggipa ma·manti bosturang jekai, jo·ong siatani sam, a·sal aro uandakgipa bosturang dam tang·dorikrikengani a·sel game ge·e cha·enggipa manderang, neng·nikanirangko chagrongna nangtokengachim.
Meghalaya a·dokni gipin biaprangode game ge·e cha·enggipa manderang, komigipa damni bitchilrangko man·engoba West Garo Hills a·jani a·kawe jolrangode iandakgipa cholrangko man·patokjaenga ine janapatengon, iandakgipa cholrangko man·jaengani a·selan a·kawe jolrango game ge·e cha·giparang, gama ge·ani kamrangosan ong·aigija janggi tanganioba neng·nikanirangko chagrongna nangtokenga ine AMMSU parakataha.
Chi banani somoio gama ge·anirang nosto ka·ako man·e noksan ong·atako man·gipa manderangna tangka paisarangko on·kujaenga ine janapatskaengon, “2016 bilsioni 2019 bilsiona chi bananirangchi a·kawe jolrango game ge·e cha·giparang bang·batan noksan ong·atako man·na nangtokaha. Sorkarini gita compensation-rangko watatahaoba ia manderangonade da·onan tangka paisarang sokbakujaenga aro iani a·sel neng·nikanirangko chagrongna nangtokenga,” ine AMMSU parakataha.
Mi bitchilrang nangana bate dam rakdugaengani a·sel game ge·e cha·giparang, mi misirangko ge·na chol ong·jaenga aro iani a·sel a·kawe jolrango gama ge·anirangba komibatenga ineba AMMSU parakataha.
Indake ong·engon, ia jolrango gama ge·anirangko bariatna man·na gita game ge·e cha·giparangna mi bitchilrangko subsidy dake on·china aro gama ge·anirango nanggipa ma·manti bosturangko sualatchina gitaba AMMSU, West Garo Hills a·jani Deputy Commissioner-ko mol·molataha.
