TURA: Bristibar pringo phone ka·e ‘ka·mikkenataha’ ine matnangenba, Garo Hills Autonomous District Council (GHADC)-ni Chief Executive Membor (CEM) Albinush R Marak-ni kosako social activist Nilbath Ch Marak, FIR ka·doangaha.
GHADC-ni Siju constituency-na chamatgipa bang·bea project-ni tangka paisarangko jakkalsreta ine CEM aro dingtang dingtang official-rangni kosako Nilbath Marak baksana Flaming Marak-ni, Meghalaya Lokayukta-na badi ka·doangani ja·man ia obosta ong·aha. Social activist-rangni badi ka·aniko man·enba, iani bidingo inquiry-ko dakchina Meghalaya Lokayukta ge·etaniko on·angahachim.
Indake ong·engon, GHADC CEM-ni kosako Nilbath Marak, Bristibar salo, Williamnagar-o FIR ka·aha aro uni FIR-o janapatani gitade, Bristibar pringo CEM, una phone ka·atenba, Lokayukta-o ka·gipa case-ko ra·pilchina ka·mikkenatahachim.
Uni phone ka·atako Nilbath, an·tangni phone-o chipe ra·rikaha aro ja·mano iako kobor ra·timgiparangnaba watataha.
Nilbath Marak-ni FIR-o parakani gitade, case-rangko ka·mikenba ua tangka paisarangko dabienga ine CEM Albinush Marak, uko matnangataha aro case-ko ra·piljagenchimode, una ‘namjawa’ ine ka·mikkenatanikoba on·aha.
“Ia case da·o kachario ong·engon case-ko ra·pilchina ua angko phone ka·e dabiataha. Ia case-o sak 22 contractor-rang gnang aro uamangoni saoba angko ba angni nokdangko nisigalna jotton ka·a ong·ode, ia pilakan CEM-ni kam ong·gen aro uan dai nanggipa ong·gen,” ine FIR-o Nilbath Marak parakataha.