SHILLONG: East Jaintia Hills aro West Khasi Hills a·jarango gital degree college damgniko ia bilsini gisepon kuligen ine Sukrobar salo, a·dokni Education Minister Rakkam A Sangma, kobor ra·timgiparangna parakataha.
Sangma-ni parakatani gitade, ia degree college-rangko kulina gita Union Education Ministry-ba ra·chakmanaha.
“Meghalaya a·doko degree college damgniko kulina ma·mongni Union Education Ministry ra·chakmanaha aro ia college-rangko East Jaintia Hills aro West Khasi Hills a·jao kuligen,” ine Sangma aganaha.
Rongjeng Degree College aro Patharkhmah Degree College-rangko a·bachengani bidingo sing·anina aganchakaniko on·angengon, ia degree college-rangko ia bilsionin a·bachengna sienga aro unbaksana Mawphlang Commerce & Science College-koba ia bilsionin a·bachengna sienga ine Education Minister parakataha.
Batanggimin bilsi 40-50-ni gisepo a·dokni Education department, dingtang dingtang neng·nikanirangko chagrongna nangenga ine janapatskaengon, “A·songni gipin a·dokrang baksa tosusae nigenchimode, an·chingo skulrang aro skigiparang bang·bata ine nikna man·a. An·ching skigiparangni gadangrangba bang·bata. An·chingo skulrang aro skigiparang bang·batgenchimoba nokrang aro dingtang dingtang nanganirang chu·ongja indiba Chief Minister-ni rakbee kamrangko ka·dilanichi an·ching bang·en dingtanganiko ra·bana man·engaha,” ine Sangma aganaha.
Batanggimin bilsi bongani gisepo MDA sorkari, college, secondary skul, primary skul aro dingtang dingtang institution-rangna gital nokrangko rike on·na man·aha ineba ua aganaha.
Gital degree college damgnina sak 100-na baten skigiparangko ra·na gita Education department, u·iatanirangko on·manaha ine janapatengon, government LP skulni skigiparangnaba sorkari, ia antini gisepon advertisement-ko on·ani cholrang donga ine Education Minister parakataha.
