TURA: Jal Jeevan Mission (JJM)-ni kamrangko name ka·jaengani a·sel, East Garo Hills a·jani Megagre songo bang·bata nokdangrangan ia scheme-ni namgniko man·tokjaenga ine Garo Hills Youth Solidarity (GHYS) matnangataha.
GHYS-ni parakatani gitade, Megagre songo ge 85 nokdangrang dongachim indiba ia nokdangrangoni ge 70 nokdangrangde, an·tangtangna on·gipa chi pipe-rango chirangan jokjaengani a·sel neng·nikanirangko chagrongna nangtokenga.
“Ia songni JJM project-ko matchotaha ine report-o paraka indiba ia songo bang·bata nokdangrangan chi jokjaengani a·sel neng·nikanirangko chagrongna nangtokenga. Ia nokdangrangna chi pipe-rangkode sokate on·aha indiba chikode man·skakujaenga. Iani bidingo chinga department-naba sedoe badi ka·ahachim indiba da·alonan department-ni manderang, ia songona re·bae kamrangko nirokejaengani a·sel songni manderang chi gri dongna nangtokenga,” ine GHYS-ni dilgiparang parakataha.
