TURA: Skul aro college-rango poraienggipa chatro chatrirangoniko Aadhar card on·china bi·enganiara, Supreme Court-ni ge·etaniko pe·ani ga·akenga ine South Garo Hills a·jani social activist Greneth Sangma parakatenba, iani bidingo a·dokni Education Minister Rakkam A Sangma-na sedoataha.
Iani bidingo, a·dokni Education Minister-na sedoatengon, dingtang dingtang skul aro college-rango poraienggipa chatro chatrirangko, an·tangtangni Aadhar card-rangko on·china gita skul aro college-rang draenga ine Sangma matnangatenba, dingtang dingtang skulrango poraienggipa chatro chatrirangoniko Aadhar-ko nangatjachina didiataha.
Aadhar Act 2016, Meghalaya Right of Children for Free & Compulsory Education Rules 2011, Constitution-ni Sixth Schedule aro 2018 bilsio Supreme Court-ni rai on·anioba skul aro college-rango poraianio Aadhar-na wataniko talen mesokmanahachim ineba Sangma parakataha.
Ia kosako on·gimin niamrangni gimin janapatengon, skul aro college-rango admission-na aro promotion-na Aadhar-ko nangtelgipa ong·ja ine skul aro college-rangna talataniko on·china, Aadhar-ko submit ka·jani gimin chatro chatrirangna sastirangko on·jachina skul aro college-rangna u·iatchina aro pilak skul-college-rangan ia niamrangko ja·rikchina gita Sangma, a·dokni Education Minister-ko didiataha.
2018 bilsini September 26 tariko, Justice KS Puttaswamy (Retd) vs Union of India-ni case-o Supreme Court-ni rai on·gipani gimin janapatengon, “Skul admission-rangna ba maiba namgnirangko bi·sarangna on·na gita Aadhar-ko nangtelgipa ong·atna man·ja aro ma·a paarangna u·iatchenggija bi·sarangoniko Aadhar nombor bi·ani ba biometric information-ko bi·aniara niamko pe·ani ong·enga ine Supreme Court, raiko on·ahachim,” ine Sangma parakataha.