SHILLONG: Meghalaya aro Assam a·dokni simarango ru·utbea bilsirangna ong·enggipa golmalrangko 2028 bilsini gisepon namatna man·gnok ine National People’s Party (NPP)-ni dilgipa aro a·dokni Cabinet Minister Ampareen Lyngdoh, ku·rachakaniko on·angaha.
Iani bidingo kobor ra·timgipa manderangna talataniko on·angengon, Meghalaya aro Assam a·dokni simao donggipa bangki damdok biaprango ong·enggipa golmalrangko NPP-chi dilenggipa MDA sorkari, 2028 bilsina skangan namatna man·gen ine Lyngdoh ku·rachakaniko on·angaha.
Assam aro Meghalaya a·dok damgnini simarango ru·utbea bilsirangonin dam 12 biaprango meligrikgijanirangko nikna man·engachim indiba ia dam 12 biaprangoni damdok biaprangkode a·dok damgnini gisepo songgigrike, biaprangko sualgrikahachim. Da·o bangki dongkuenggipa damdok biaprangoba a·dok damgnini gisepo meligrikaniko ra·bana gita a·dok damgnini sorkarirang agangrikaniko a·bachengatahachim indiba ia agangrikanirang da·onan matchotchipskakujaengachim.
“Meghalaya aro Assam a·dok damgnini simarango bangki dongkuenggipa damdok biaprangoba chinga 2028 bilsina skangan meligrikaniko ra·bana man·gen,” ine Lyngdoh aganaha.
Meghalaya a·dokni Land Transfer Act-ko pe·na aro a·dokni a·arangko gipin biapni manderangna on·na gita a·dok sorkario maming miksonganirang dongja ineba Cabinet Minister ku·rachakaniko on·angaha.
Iani bidingo ku·rachakaniko on·angengon, opposition dolrangni tol·e matnanganirangko aro bringbrangatna jotton ka·anirangko bebera·jachina ine Lyngdoh, Khasi aro Jaintia Hills a·jani manderangko didiangaha.
“A·dokni a·arangara party ge·sanisan ong·ja indiba an·ching pilaknin ong·a,” ine ua aganaha.
A·dok sorkarini dakchakani gride gital executive committee-ko rikanio je party-naba neng·beani ong·gen ine agananichi badiaba manderangko gisik saataha ine ku·rachakangengon, KHADC aro JHADC damgnion NPP, gipin party-rangni bakrimaniko man·gen ine Lyngdoh, an·tangni ka·dongchakenganiko parakataha.