SHILLONG: Meghalaya-ni Indo-Bangladesh sima-arigita niamgri Bangladesh-ni manderangni napdrabana jotton ka·anirang chotchangjaenga aro batroroenga, jeon sima ariko nitim-nirokenggipa chel·chakgipa dolrang, Indiaona napdrabana jotton ka·giparangko rim·a man·simenga.
Border Security Force (BSF)-ni saksa a·gipi official-ni aganani gitade, Bangladesh-ni manderangni, Indiaona napdrabana jotton ka·anirang batroroenga indiba niam-gri napdrabana jotton ka·enggiparangko chel·chakgipa dol namedaken champengsoenga.
“Chingni bang·bata officer-rangan biapon dongkamenga, aro napdrabaanirangko champengna gita chinga bang·a cholrangko ra·gataha” ine official aganaha.
Nitimani kamrangko bilakbatatna gita BSF, CCTV camera-rangko donaha aro sima-arigita batsotna am·giparangko nikna man·na gita thermal imager-rangkoba donaha. Indo-Bangladesh sima ariko silchek kadulanirangko matchotgijarang dongenga baksana diltugipa buring-bolgrimrang dongani gimin sima ariko nirok-simsakani dal·begipa ra·bianirang donggenchimoba sima-ariko mangrake rakkina gita uamang jotton ka·enga ineba BSF official aganaha.
Indake kobor man·soanirango pangchake am·sandianirangko dakanio batanggimin somoio BSF sipairang, sima-arigita batsotna jotton ka·giparangko champengna man·aha.
Unbaksana adita salrangna skang mangmango Bangladesh-ni sakbri aro saksani Indiani driver-ko Maruti Alto garioniko rim·a man·aha. Sing·sandianiko dakon, uamang adita jarangna skango India-ona napbaaha aro Bangalore-o ba·ra sikani kamrangko ka·engahachim. Indake uamang da·o Bangladesh-ona re·angpilna gita jotton ka·engachim.
Rim·a man·gipa manderangara Bangladesh-ni Narayanganj-o donggiparang ong·achim, uamangko sing·sandianiko dakchina gita Pynursla Police Station-na pakwatataha.
