BAGHMARA: Re·anggipa 2024 bilsini May jao, Core Geo Expedition dolni South Garo Hills a·jaona re·bae Tolegre songo am·sandie man·gipa ‘fossil’ ba ro·ong pil·gimin gitcham matburingrangni dongspako ma·sina man·gijagipa manderang cha·ue kataha.
Re·anggipa bilsini May jao, Core Geo Expedition dolni manderang, jasa batpile ia jolrangko wenani ja·man, chengoni ro·ong pil·gimin gitcham matburingrangni dongspako Tolegre song sambao donggipa Gongdap songoniko nikchengahachim.
Core Geo Expedition dolni nikani ja·man, Geological Survey of India (GSI) dolni official-rangba re·anggipa bilsio ia biapona re·bae, ia matburingrangara maichim aro badita bilsirangnichim uko tale ma·sie ra·na gita ia biaponiko adita sample-rangko ra·angaha.
Ia gitcham matburingrangni ro·ong pil·gimin dongsparangko nikani ja·man, ia biapko chel·chake rakkina songni manderang aro district administration-ba ia biapona skatang napaniko raken champengatahachim.
Indake ong·genchimoba walgittammangna skang, ma·sina man·gijagipa manderang, ia biapona re·angenba, ro·ong pil·gimin bimangrang chu·gimikkon cho·enba ra·e katangaha ine kobor on·timgiparang parakataha.
Iani bidingo kobor man·soa bakan songni manderang, South Garo Hills a·jani Superintendent of Police (SP)-na kobor on·atskaaha.
“Ia biapo donggipa gitcham bosturangko cha·uaha ine kobor on·atani ja·man dolsa police-rang, ua biapona re·angaha indiba ua somoio songni nokma ba secretary-ba a·bap kam ka·engmiting ong·e grongbana man·jaha. Indiba uamang, songni manderang baksa agangrikbana man·aha aro songni manderang, iani bidingo FIR ka·na miksongenga,” ine SP Shailendra Bamaniya parakataha.
Indake ong·engon, ia biaponiko ro·ong pil·gimin gitcham matburingrangni dongspako cha·uahani gimin South Garo Hills a·jani social activist saksa Greneth M Sangma-ba, South Garo Hills a·jani SP-na FIR ka·doangaha aro ia biapona ta·raken re·angenba, am·sandianirangko dakchina didiataha.
SGH-ni Tolegre songo man·gipa ‘fossil’-rangko cha·ua, Social Activist saksa FIR ka·a
Date:
Share post:
