TURA: West Garo Hills a·jani Demdema C&RD Block ning·o donggipa Bhangarpar songo, 2024-25 bilsina MGNREGA-ni kamrangna bostu namgijaniko jakkalenga aro kamrangko dongimin niamrang gita ka·jaenga ine songni Gaonbura, Demdema Block-ni Block Development Officer (BDO)-na badi ka·doangaha.
Demdema block-ni BDO-na badi ka·doanggipa chittio parakatani gitade, 2023-24 bilsini MGNREGA scheme-oba kamrangko niam gita ka·jahani gimin songni Gaonbura, songni manderang baksa re·anggipa 2024 bilsini June 10 tariko badi ka·ahachim aro iani bidingo inquiry dakna ku·rachakaniko on·ahaoba inquiry report ba official-rangni sandie man·aniko songni manderangnade mamingkon u·iatpiljahachim.
“Ia bilsioba apsan daken MGNREGA-ni kamrangko name ka·jaengani gimin chinga badi ka·dona nangao ga·akenga,” ine Bhangarpar songni Gaonbura, Demdema Block-ni BDO-na badi ka·doanggipa chittio parakataha.
Ia bilsioba MGNREGA-ni kamrangko nangani kri ka·jaenga ine matnangatengon, nanggijagipa biaprangoba retaining wall-rangko tarienga aro ian manderangni tangka paisarangko indin bon·ata gita ong·enga ine songni Gaonbura parakataha.
Kamrangko estimate ka·gimin gita ka·jaenga ine badi ka·doangskaengon, kam ka·anirangko technical official-rang nirok sandianirang dongjaengani a·sel kamrangko name chu·sokatjaenga ine songni Gaonbura matnangataha.
“Skango chinga badi ka·ahaoba ia kamrangko namdapatani pal da·o batesa namrorojaenga, uni gimin kamrangko estimate gita ka·atchina aro je kamrangkon name ka·jahachim, iandakgipa kamrangni bidingo inquiry-ko dakenba, inquiry repory-ko songni manderangnaba mesokchina chinga mol·molenga,” ine Bhangarpar songni Gaonbura, Demdema C&RD Block-na sedoatgipa chittio parakataha.