SHILLONG: Article 371-ko ra·gatchina ku·rang on·eba, re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susaenga ine Congress dolni dilgipa Ronnie V Lyngdoh, Voice of the People’s Party (VPP)-ko matnangataha.
Lyngdoh-ni aganani gitade, KHADC aro JHADC election-o chee, gital Executive Committee-ko chalaina man·genchimode Article 371-ko ra·gatchina dabigen ine VPP-ni president Ardent Miller Basaiawmoit aganahachim.
VPP-ni ‘tol·pinapgipa’ kattarangko bebera·jachina Khasi Hills aro Jaintia Hills-ni manderangko didiatengon, Tribal manderangni bilrangko warachakna aro Nokma, Dorbar, Hima, Raid ba uandakgipa jatni dilgiparangko chel·chakna district council-rangna bilko on·enggipa Constitution-ni Sixth Schedule-ko Congress dolsa on·chengaha ine Lyngdoh, gisik ra·atpilaniko on·angaha.
Mylliem-ni VPP candidate, Aibandaplin Lyngdoh Nonglait-ko matnangatengon, 2023 bilsini Assembly election-na campaign ka·engmiting somoio ia me·chik candidate, Theology poraie matchotaha ine an·tangko manderangna tol·e on·aha ine Congress dolni dilgipa parakataha.
“Assembly election-o uni file ka·gipa affidavit-ni copy-ko chinga man·aha aro uni affidavit-o ua Laban Presbyterian School-o higher secondary-ko matchotaha ine seaha,” ine Mylliem-ni Congress MLA Ronnie V Lyngdoh aganaha.
Theology-ko poraia ine ia me·chik, manderangko salna jotton ka·aha ineba ua matnangataha.
Election-o chena skangan ua manderangko togina man·a ong·ode, election-o cheani ja·mande uo maikai ka·dongna man·kugen ineba ua aganaha.
