SHILLONG: Re·anggipa Bristibar salo, Meghalaya Cabinet tom·aniko ong·atangenba, taridapgimin service rule mingbriko ra·chakangaha.
Ia taridapgimin service rule-rangara, Meghalaya Accounts Service Rules, 1996, Meghalaya Local Fund Audit Service Rules, 1996, Amendment of Rule 5 of the Meghalaya State Electricity Regulatory Commission Rules, 2003 aro Meghalaya Food and Civil Supplies Rules, 2001 ong·a.
Ia service rule-rangko taridapani bidingo talataniko on·angengon, “Departmental promotion-rangko dontongatahani gimin neng·nikanirangko chagrongna nangenga, uni giminsa ia niamrangko taridapna nangaha,” ine a·dokni Chief Minister Conrad K Sangma parakataha.
“Ia niamrangko taridapaniara badiaba badiaba Office Memorandum (OM)-rangko ra·dapna gita taridapanisan ong·aia. Mitam niamrangode kattarangko aro mitam niamrangode gadangko dingtangatna nangaha. Mitam niamrangode cabinet-ni tik ka·gimin dongani gimin meliatna gita ia niamrangko taridapskana nangaha,” ineba Chief Minister aganaha.
“Uni gimin ia mingbri service rule-rango nanga gitasa ia niamrangko taridapaha,” ineba ua aganaha.
