TURA: Re·anggipa Bristibar salo, Tura-ni TVS showroom-oniko sale nia dakmikenba scooty sale katgipa mandeko police-rang, Bristibar attamo rim·na man·aha. Uni sale katanggipa scooty-koba apsan walon, TVS showroom-ni manderang, police-rangni dakchakanichi ia mandeni nokonikon man·pilaha.
Koborko on·ani gitade, Bristibar salo, bilsi 23 ong·gipa Sengdobirth T Sangma, New Tura-o donggipa TVS showroom-ona re·angenba, ia showroom-o palenggipa Ntorq 125 scooty-ko brena ine sale nina bi·mikaha. Ia mande, scooty-ko sale nina bi·ahani gimin showroom-o kam ka·enggiparang, uni Identity Card aro gipin nanga lekkarangko bi·on, uni kebitanggipa jolonggako uamangna on·enba, ia jolonggaon pilak lekkarang donga ine ua aganaha.
Uni jolonggako on·ahani gimin showroom-o kam ka·enggiparang uo ka·dongchakenba, una scooty-ko sale nina on·ataha indiba ua scooty-ko sale re·angaoni showroom-ona re·angpiljaha.
Adha kontamangna ia mande, scooty-ko ra·angpiljahani gimin showroom-ni manager, bakan Araimile Beat House-ni police-rangna u·iataha aro FIR-koba ka·aha.
FIR ka·ani ja·man, police-rang ia mandeko am·sandina a·bachengataha aro ia mandeko Rongram police station-ni Asanang samba jolo donggipa Migre songoniko rim·na man·aha.
Ia mandeni cha·uanggipa scooty-koba uni nokonikon man·pilaha.
Ia mandeni scooty sale re·angengmitingko showroom-o donggipa CCTV camera-rango man·rikaha aro ia video-rang ta·raken social media-rango giproroangaha.
