RESUBELPARA: 2025 Garoland State Movement Committee (GSMC) uamangni General Annual Conference-ko meja Sonibar-o Resubelpara Northern zone, Sangkni Resort-o ong·ataha. Ia Conference-ko Additional General Secretary chalaiaha. Central Executive Committee H.Q Tura-oni, Zonal, Regional Unit, Unit-rang, Sub-Unit-rang gimikoni dilgiparang ia Annual Conference-o bakko ra·aha. Ia conference-o Garo Hills Autonomous District-ni CEM gitcham arto GSMC-ni Chief Adviser Chief guest ong·aha.
Conference-ni mongsonggipa chanchiani gimik kam a·baon GAROLAND-ni chu·sokanina dkgrikna aro re·mikkangani gimin ong·a. Mongsonggipa agangiparang- P.K Sangma gitcham CEM GDC aro Chief Adviser GSMC, Te, Balkarin Ch. Marak Acting Chairman CEC H.Q Tura, Medison B. Marak Chairman Raksamgre Unit, Sengjan N. Arengh Chairman Rongjeng Unit, Jacky Chairman Northern Zone, Thillingbirth Ch. Sangma Chairman South West Zone, iamang ong·a.
P. K Sangma, Garoland a·dok dingtang man·a maikai dakgrikenga uni gimin ia chang baksa battingimin somairango krengani gimin agane chingni dabianirangko man·jana kingking an·ching watgaljawa ine aganaha. Jensalo Captain Williamson A. Sangma 1950 bilsionin Meghalaya a·dokko man·a krengaha aro sa·dikanirangko man·aha pilak chu·sokgijanirangko chena Assam Re-Organizations Act-oniko janape an·tangan on·chake jotton ka·aha uni gimin da·alo an·ching an·chingni dabiani mingantio bil gnanggipa ong·gen an·chingni nisanrangko tariangkuna aro nisan dona nangenga, ku·cholsan kamko ka·na bil gnanggipa chadamberangko an·ching didina nangenga jedakode an·chingko darangba onia ka·na man·jawa P.K Sangma aganaha.
Gipin a·brini manderangko nisusate an·ching A·chikrang kamrangko, reservation policy, Human Resource unagreba gipin gipin namgni cholrangko man·enga. Minganti chu·sokaniko niate an·ching an·chingni nangnike dabienggipako man·a ku·cholsan kamko ka·na nanggen, jekon changsao P.A. Sangma an·chingni a·brini jatrang Garoland a·dok dingtangna dabienga uko house knaachakna nangchongmotgen Parliament-o aganachim. Uni gimin Garo Hills-osan ong·aigija an·chingni ku·rangko rakatna nangenga aro New Delhi-o see on·gipa Memorandum-ni gimin da·o aro mikkangchi jemangan a·dok dingtangna dabiengachim ua a·dokrang baksa agangrikenga, ua aganaha.
A·dok dingtang dakanina Indian Constitution-ni Article 3-o pangchake Balkarin Marak uni aganao Garoland-na GSMC batanggimin 13-mangna skangonin ja·ku de·enga indiba da·alonaba be·en pilna man·kujaenga. Uni gimin jadongaani gri Garoland-ko man·jana kingking dakgrikangkugen. Siaona kingking an·chingni songreaniko dontongjawa, ua aganaha.
Garo Hills an·chingni atchiram a·song ong·a uni gimin Garoland-na an·ching songreangkugen aro dabiangkugen. Mingantio songsalko nambatatna on·kange kamko ka·na GSMC-ni mongsonggipa nisan ong·a. An·chingni a·ja ba A·chikrang gipinrangchi dokkol ka·enga aro neng·nikaniko man·enga, ua aganaha.
Medison B. Marak-ba gipinrangchi dokkol ka·ako man·jana gita Garoland-na an·chingni niksamsoaniko chu·sokatna an·ching A·chik manderang ku·cholsako kamko ka·na nangenga ine aganaha.
Sengjan N. Arengh-ba an·chingni miksonganiko skangna baten rakbatatna nanggen ine aganaha.
Garoland State Movement Committee (GSMC) tom·ao chanchirimani ja·mano Purakasia Unit-ni Chairman Teran Ch. Marak-chi Isolo bi·e tom·ako matchotataha.
