Smart Meter project chu·sokna man·kujaenga, approval-na sengenga: Power Min

SHILLONG: Meghalaya-ni miksong-chanchienggipa Smart Meter project, a·dok sorkari Power Ministry-oniko ra·chakaniko man·a sengenge dongkue chu·sokna man·gija uan baibai ong·kuenga.
Tangka-paisani gita chanchieba chanchianirango jadonggaenga. Ua project-na tender-ko on·manaha indiba contractor-ni de·e mesokgipa tangka-paisa chanchisoana bate ong·enga, salgro-salaramni gipin a·dokrango apsan korosko nie uamang ma·mong sorkario janapaha, kam ka·angna skang nambate chanchianiko nangnikenga, Power Minister AT Mondal parakaha.
Obostako India sorkarina mesokaha aro ua uni gitan Power Ministers Conference-ona ra·angahachim indiba aganchakaniko man·kujaenga aro somai batomangba project-ni tangka-paisako done smart meter-ko ra·gatna sorkari kam ka·enga ine Ma·mongko didiaha, ua aganaha.
Smart meter-rang chongmotni bidingo aganao, kam ka·na skang ge·etanirangko rake ja·rikna nanggen, smart meter-rangko namedake patna man·jawa aro ra·chakanina ra·gatgipa agency-rangni daito ong·a aro pilak nangchongmotgipa chek ka·anirangko dona gita ka·donge Mondal aganaha.
Smart meter-rangni accuracy-ni gimin manderangni neng·nikaniko aganani bidingo bijoli jakkalgiparangni gisik nangani skanggipa dakgni kamo ong·kuenga ine minister aganaha.
“Maiaba neng·nikani dongode chinga uarangko dake ka·e on·gen aro manderangko ka·dongchina agangen,” ua aganaha.
Bijolini bill-rang bang·e sokna bijoli jakkalgiparangni kenengani bidingo smart meter-rang bijoliko tik tak jakkalani on·gen aro patronggipa meter-rang baksa smart meter-rangko patani reading-rangko uamang nisusana man·gen ine Mondal talataha.
Bijoli jakkalako tik tak sandina man·jaeba mitamrang bill bang·e sokako niknaba donga, badita jakkalaha chongmotko ma·sina meter-rangko tariaha, ua aganaha.
Project-ni da·o ong·enga obostani gimin aganao tender on·ani kam matchotaha, rate-ko man·aha-contractor-ni janapgimin koros a·dokni dona bate batengako janape minister agantaiaha.
“Rate-rang salgro-salaramni gipin a·dokrang baksa melienga, chinga iako Power Ministry-ona de·e mesokna nangenga aro talbate agangrikanina chinga sengenga,” ua agandapaha.