SHILLONG: Skul bi·sarang social media-ko jakkale namgijani ong·enga maina uamang uamangni poraianirangna gisik nangjaenga.
Nangni bi·sani social media-ko jakkale namgija ong·ani gisiko sin·jetaniko man·ataniba ong·na man·a. Uamangni name dongenggipa gisik aro janggi tangani bidingo namgija ong·kamaniko ma·sija social media-ko jakkalgipa skul bi·sarangna kengni ong·a.
Skul bi·sarangni gisepo social media-ko jakkale namgija ong·ani bidingo Education department-ni a·gipi official aganao jean nama jakkala una namgni ong·a indiba ranta ong·ode nosto ong·na man·a ine aganaha.
St Edmund’s School-o counseling-ko dake uni u·i-ma·sianiko janape bang·bata bi·sarangan neng·nikaniko chagrongenga poraianio gisik on·a ba nisan dona amjaenga ine ua aganaha.
Chadambe skul bi·sarangni gisepo poraianina gisik nangani komiaha maina chongmote uamang phone donggija dongna man·jae kandikdik dakgipa video-rangko nie ranta ong·aha.
Second 30-na bate bi·sarang gisik on·a man·jaha, ata kotani class-o minit bonganasan mangmang skigiparang aro bi·sarang gisik on·a man·aia, ua aganaha.
Social media-ko jakkalna chanchisokna nanga, da·o ong·enggipa neng·nikanide poraigiparang social media-ko jakkalna gisik chanchisokna skangan uamang agre jakkalengani a·selo bi·sarang nosto ong·enga ine ua aganaha.
Mobile phone-ko skanggipa done maina bi·sarang jakkalenga uko niate uamang internet-ko agre jakkalna ska, computer-o uamang Wikipedia aro YouTube-o documentary-rangko nina man·genchin, a·gipi official aganaha.
Indake ong·engon, Holy Child School principal gitcham, Sr. Delphine Fernandez, social media-ko jakkale an·chingni mikkangchini chasongni janggi tanganirangna namgija ba nosto ong·aniona sokani bidingo sakantian jajrengenga ine aganaha.
Social media ranta ong·ata aro chadambe bi·sarangko nosto ong·ata uamangni poraianio aroba gipin gipin kamrangko dakdap-ka·dapanirango uamang gisik nangna man·ja aro gisik nanganiko komiata, ua aganaha.
Reel-rang, video-rangko nie aro game-rangko kale cha·na-ringna gualpile uamang somaiko re·ata, Sr. Fernandez aganaha.
“Bang·a poraigiparangan cyber-o pagol ong·enga aro mitarang ma·sigijana kenenga indake gisiko sin·jetaniko man·anina uamangko Isolo bi·atna nangenga. Tusiani somairang dingtangaha indake ong·gija kamrangna gisikni gita neng·nikaniko man·enga,” Holy Child School principal gitcham aganaha.
Maiaba maijaba ong·na kene ma·gipa-pagiparang uamangni bi·sarangna mamingkon agana paja, ua aganaha.
Social media-ko agre jakkalako nirokchina aro social media-ko agre jakkalode uamangko nosto ka·gen aro skulo poraimiting salrango phone agre phone jakkalani namja ine ku·pattie on·china Fernandez, ma·gipa-pagiparangko didiaha, aro maikai a·palo kal·anirang, skulo, noksulo ripeng dakani aro ma·drangni nokrangona re·angani gimin agane on·china ge·etaha.
Little Flower School-ni science teacher, Joydeep Sen, social media-ni poraigiparangni gisik nanganio namanchajaha, poraianina uamangko gisik nangatna neng·a aro gisik nangani namen komiaha ine aganaha.
Batanggimin salrango poraigiparang gisik nangachim indiba da·o kandilgipa reel video-rangko nie gisik nangani komiaha ranta ong·aha aro da·oni chadamberangna namgijani ong·batenga nosto ong·engaha, ua aganaha.
Poraiani bako bi·sarangko gisik nangatna dal·begipa neng·nikani ong·enga, Sen aganaha.
