SHILLONG: Pilak kamrangon manderang, National People’s Party (NPP)-ni chu·sokgipa ong·aniko nikahani gimin re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o bang·bata seat-rangkon NPP chegen ine Budbar salo, a·dokni Cabinet Minister aro NPP-ni dilgipa Ampareen Lyngdoh, an·tangni ka·dongchakenganiko parakataha.
Iani bidingo kobor ra·timgipa manderang baksa agangrikengon, KHADC aro JHADC election-o susana gita NPP, bilakbee kamrangko ka·soengaha ine Lyngdoh parakataha.
“Chingni miksonganian ia election-o cheanisa ong·enga aro ia miksonganiko chu·sokgipa ong·atna chinga pilakan rakbee kamrangko ka·gen. Ia election-o ka·o nanggrikani aro miknenggrikani dongjana gitaba chinga jotton ka·enga. An·ching pilakan mingsako gisik ra·na nanga aro uan an·ching pilakan Meghalaya a·dokni manderangna dangdike on·anian ong·a,” ine Lyngdoh aganaha.
Ia MDC election-ara batanggimin changrango ong·atanggipa gipin election-rangoni dingtangnaba gnang ineba ua aganaha.
“Anga result-rangni giminde bang·e agansamsona gita nangnikjaenga indiba chingni candidate-rang, biaptangtango rakbee kamrangko ka·enga aro chinga party-ni gita uamangna pilak nanga dakchakanirangko on·enga. Ia changba chinga a·dok sorkario gitan gipin dolrang baksa bakrimna ka·dongsotaienga,” ine Lyngdoh aganaha.
Gipin party-rangni a·kanganirangna aganchakaniko on·angengon, ia MDC election-de batanggimin chang MP election-oni namen dingtanggen ine NPP-ni dilgipa aganaha.
“Ian democracy-ni katchaani ong·a maina pilak party-an chakate, angni party cheenga ine aganaigen aro iani bidingo darangba darangkoba maming dakna man·jawa. Indiba chong·mot result-rangsa chong·mot obostakode mesokgen. Anga jechi re·anggenoba, ia MDC election-de MP election-oni dingtangna sienga ine mesokanikosa nikna man·enga,” ine Lyngdoh aganaha.
1972 bilsini ja·man da·o NPP-sa bang·bate membor dongchenggipa party ong·aha ineba ua gisik ra·atpiltaianiko on·angaha.
NPP-ko aro party-ni kamrangko matnangronganina aganchakaniko on·angskaengon, “An·chingni songsalchiko niate nibo, rama jal·langrango ong·ja maina, an·seng baljokani kamrango ong·ja maina, lekka porao ong·ja maina pilak kamrangon NPP kam name ka·jaenga ine darangba tol·e aganna man·jawa. Ia kamrangko manderang nikgija ba knagija ong·jawa ine anga bebera·a. Na·simangni wilwilao mai ong·enga na·simang an·tangtangan da·o kamrangko nikna man·enga,” ine Lyngdoh aganaha.
