TURA: Batanggimin sal somoirangonin Bangladesh a·songoni niam gri India a·songona re·napbaenggipa manderangko BSF aro Meghalaya police-rang rim·na man·engon, Budbar waloba, Bangladesh a·songoni re·napbagipa manderangko, uamangko re·napbana dakchakgipa manderang baksa gimik sakskuko BSF aro a·dokni police-rang, West Garo Hills a·jani Dalu jolo rim·na man·aha.
Bangladesh a·songo so·sojengjeng ong·engani gimin India a·songona napsrukbana jotton ka·anirang batroroengon, re·anggipa bilsionin BSF aro a·dokni police-rang, a·song damgnini simarango bilakbate nirok sandianirangko dakenga aro uandaken Budbar waloba, Bangladesh a·songoni re·napbagipa manderangko West Garo Hills a·jani simaoniko rim·na man·taiaha.
Ia manderang, ML-14A 0593 Maruti Ecco Van aro ML-09A 3830 Maruti car-o songrebaengachim aro uamangko jolni sakgittam manderang, re·napbana dakchake on·engachim.
Ia gari bolgniko BSF aro police-rang champengsoenba am·sandion, ia manderangni niam gri tarigipa Indian Aadhar card-rang baksana mobile phone ge 12, dingtang dingtang SIM card-rang aro gong 29,500 India a·songni tangkarangkoba, ia manderangoniko man·aha.
Rim·ako man·gipa Bangladesh a·songni manderangara, bilsi 39 ong·gipa Md Mostafa, bilsi 38 ong·gipa Manir Hussain, bilsi 32 ong·gipa Md Manik Mia, bilsi 49 ong·gipa Nasir Ahmed, bilsi 28 ong·gipa Md Shah Alom, bilsi 39 ong·gipa Motaleb Sk, bilsi 29 ong·gipa Sofiqul Islam Badshah, bilsi 36 ong·gipa Bilal Hussain aro bilsi 42 ong·gipa Joel Miah ong·achim.
Ia manderangko re·napbana dakchakani gimin rim·ako man·gipa manderangara, Purakhasia jolo donggipa Dusinggre songni bilsi 29 ong·gipa Sengbat R Marak, Dalu jolo donggipa Begkagittim songni bilsi 18 ong·gipa Prebiush M Sangma aro Dalu jolo donggipa Nokchi songni bilsi 42 ong·gipa Samarendro Koch ong·skaa.
Rim·a man·gipa manderangni kosako mokordoma ka·e da·o ia manderangko kachariona pakwatataha.
