SHILLONG: University of Science & Technology Meghalaya (USTM)-ni ning·o donggipa PA Sangma International Medical College & Hospital (PIMC)-ni Health Shuttle Service-ko Bristibar salo, a·dokni Chief Minister Conrad K Sangma a·bachengate on·angaha aro ia service-ko a·bachengatanio, a·dokni Health Minister Ampareen Lyngdoh aro USTM-ni Chancellor Mahbubul Hoque-ba dongpaaha.
Ia health shuttle service-ko a·bachengate on·anganio, a·dokni Chief Minister, jinmana aganprakangengon, ian manderangna sanna bananirangko on·anio namen dingtangmanchagipa ja·ku de·ani ong·enga ine parakatenba, ia shuttle service-ko a·bachengatengani gimin PIMC-ko mittelpilangaha.
Medical college-ko kulianio dingtang dingtang neng·nikanirangko chagrongna nangahaoba sanna banani cholrangko namdapatna dingtang dingtang ja·kurangko de·enga ine PIMC-ko mittelpilangengon, ia health shuttle service-ara songadam nokadamrango donggipa manderangnasan ong·aigija Shillong aro una bate chel·ao donggipa manderangnaba namgni ong·gen ine Sangma aganaha.
Ia health shuttle service-ko a·bachengatanio, a·dokni Health Minister Ampareen Lyngdoh-ba jinmana aganprakengon, iani bidingo PIMC-ko mittelpilangenba, ia shuttle service-ko a·bachengatanichi songadam nokadamrango aro chel·gipa biaprango sagipa manderangko somoi gita hospital-rangona sokatna man·gnok ine parakataha.
Ia health shuttle service-ara, jillarangosan ong·aigija songadam nokadamrangoba saenggipa aro uamangko nitimenggipa manderangko hospital-rangona salbae on·na a·bachengatenggipa chol ong·enga. Ia Health shuttle service-ko bol 10 garirangchi a·bachengatenga aro ia bol 10-oni bol bongakode songadam nokadamrangna aro bol bongakode Shillong songjinmako man·chape jilla jolrangna on·enga.
