TURA: Niam gri sawmill ba bol ratani karkanarangko chalaiengani a·sel Garo Hills-ni bol wa·arang gimaroroangengahaon, Raksamgre Sub-Division-ni ning·o donggipa Rongsai songoba niam gri sawmill-ko chalaienga aro ia sawmill-ona niam gri bolrangko ra·angengani a·sel buring bolgrimrang porongrong ong·roroangengaha ine A·chik Dedication Integrity Leaders (ADIL) Western Zone Phulbari, Garo Hills Autonomous District Council (GHADC)-ni ning·o donggipa Raksamgre Range Office-na badi ka·doangaha.
Raksamgre Range Office-ni Ranger-na badi ka·e sedoatengon, Rongai songo maming permit gri saw mill-ko chalaienga aro ia sawmill-ara niam gri chalaienggipasan ong·ja indiba ia sawmill-ko chalaiengani a·sel buring bolgrimrango donggipa sam-bolrang aro do·o-matrangba gimaroroangengaha ine ADIL Western Zone Phulbari-ni dilgiparang parakataha.
Raksamgre jolrango, official-rangni mikkangon walni somoirango bolrangko rate salangenga ineba ADIL Western Zone Phulbari-ni dilgiparang, GHADC-ni forest official-rangna badi ka·doataha.
“Uni gimin ia niam gri chalaienggipa saw mill-ko ta·raken chipatchina aro walni somoirango bol salruraaniko champengchina chinga nang·ko didienga,” ine ADIL Western Zone Phulbari-ni dilgiparang, Raksamgre Range Office-ni Range officer-na badi ka·e sedoatgipa chittio parakataha.
Ia sawmill-ni bidingo nanga gita sandirokanirangko dakenba, ia sawmill-ni kosako nanga gita ja·kurangko de·china aro niam gri bol salruraanirangko champengatchinaba ADIL Western Zone Phulbari-ni dilgiparang forest official-rangko didiataha.
