SHILLONG: Re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na skang dingtang dingtang political dolrangni gisepo matnanggrikanirangko nikna man·engon, Meghalaya a·dokni gipin political dolrangko bilna ‘mikbokraka’ ine Voice of the People’s Party (VPP)-ni president Ardent Miller Basaiawmoit matnangataha.
Sohiong constituency-ni ning·o district council election-na campaign ka·angengon, jolni political dolrang, election-na skangde Congress, BJP aro NPP gita dakgipa national party-rangko matnangronga indiba election-ni ja·mande bilo ong·na mikboke, ia dolrang baksaan bakrimronga ine Basaiawmoit, UDP aro HSPDP dolrangko matnangataha.
Basaiawmoit-ni aganani gitade, Meghalaya a·dokni regional party-rang, Congress ba NPP sorkariko dilgenchimoba pangnan sorkariko chalaianio bakrimronga.
2023 bilsini Assembly election-na skang bilsibongana apsan bakrimani ja·man ia regional party-rangko a·dokni Deputy Chief Minister Prestone Tynsong matnangahachim ine gisik ra·atpilengon, indake ong·genchimoba election-ni ja·man ia apsan political dolrangan, NPP-chi dilenggipa sorkario bakrime an·tangtangni mikkimko ra·ongalaha ine VPP-ni president matnangataha.
Re·anggipa bilsini Lok Sabha election-o Shillong constituency-ko chegopani ja·man bang·bata political dolrangan VPP-na kentokaha ineba ua aganaha.
Lok Sabha election-o cheahani gimin VPP, quarter final-ko chea gita ong·aha aro ia ADC election-ko cheahaode uamang semi final-ko chea gita ong·gnok ineba Basaiawmoit parakataha.
“Uni gimin na·simang pilakkon da·o bilsi gittamna VPP-na chakpaaniko on·angkuchina didienga, jedakode 2028 bilsini Assembly election-oba chinga chee a·doko sorkariko rikna man·gen,” ine VPP president aganaha.
