Tura: Meghalaya a·dokni ning·o namroroanio apsan dakgipa gadango tang·doataniko aro A·chik jatna didianiko on·angkuna maming jajaanigri re·mikkanganio acting chairman Shri Balkarin Ch. Marak aro General Secretary Shri Tony Tojrang B Marak-chi dilenggipa Garoland State Movement Committee (CEC), H.Q Tura aro uamang baksana A·chik State People’s Front (CEB) H.Q Tura-ni General Secretary advocate Smt. Bernita R. Marak aro Chief Organizing Secretary Shri Raksim R. Marak-mangni gita Meghalaya-ni Chief Minister-na lekka segipa memorandum-ko on·ataha. Lekka seatgipa memorandum-o Tura-ko a·dokni Winter Capital dakchina mol·mole seataha.
Republic Day-ko maniani somoio Assam Chief Minister Shri Himanta Biswa Sarma-ni gita agananiko dakani ja·man ia mol·molani chittiko seataona sokaha. Ua indake aganangaha, Tezpur-ko Raj Bhawan dakanggen, Silchar jillako mini-secretariat aro Chief Secretary-ni office dakanggen, ine ua aganaha. Sorkariko name dake chalaina aro kam ka·angna man·a gita administrative aro executive-ko chalaina dingtang dingtang biaprango India-ni gimikni a·dokrang ia bakrime kam ka·anina re·chakatani baksa baririkrikengaha. Uni gimin Tura songjinmako Meghalaya a·dokni Winter Capital dakchina Garoland State Movement Committee aro A·chik State People’s Front mol·molaniko ra·baaha.
Tura songjinmako Winter Capital dakna mangmangsan A·chik jat dabienga ong·ja indiba a·dokni administrative-o kam ka·aniko bilakdapatnasa ong·enga. Tura songjinma ian Meghalaya-ni western bako donggipa ong·a, ia re·chakatanina namgipa biap ong·a, aro indakgipa ja·ku de·anina nangchongmotgipa rika cho·anirangko dakchakna tarigipa ong·a aro ian biap a·jana namgni ong·anggen, ine chingni lekka seatgipa memorandum-o organization dolrang janape seataha.
A·doko sorkariko rikna bang·a nangdapanirangna aro kragipa balance-o dilangna nanganio pangchake Tura-ko Winter Capital dake on·china dabienga. Iani gimin darangan ma·sia jeon India-ni dingtang dingtang a·dokrango uamangni a·jarangna dingtang dingtang dakgipa administrative nanganina dingtang dingtang secretariat office aro Raj Bhawan-rangko a·bachengataha. A·chik jatni palo, Garoland State Movement Committee aro A·chik State People’s Front-ni gita memorandum-ko on·angaha, bebe ra·a Tura, Garo Hills-ni skang chasongoni skotong ong·baenga aro jatni dakbewalrangko ripingbaenga, Winter Capital ong·e ra·angna basegipa miksongani ong·a.
A·chik jatni namgnina Chief Minister aro cabinet minister-rangni gita apsan dakgipa gadango namroroaniko on·a aganna nangchongmota ine Garoland State Movement Committee-ni acting chairman Shri Balkarin Ch. Marak aganaha. Meghalaya a·dokni manderangna namgniko on·a aro nambatgipa sorkariko rikangna man·a a·dokni namroroaniko bilakdapatna nisan donan baksa bakrimgipa ong·e ia dabianirangna tom·anio Tura-na nanganiko sorkari ma·sichakna nangchongmota ine ua mol·mole agandapangaha.
Mikkangchi uamangni jatrangna tengsugipa ong·angna aro nambatgipa ong·atangna Garoland State Movement Committee aro A·chik State People’s Front ong·e uamangni jotton ka·aniko dakangkugen aro Garo Hills-ni manderangna kakket bichalko on·anganio ia memorandum-ko on·anian re·mikkangani chin ong·enga.
