SHILLONG: Chang 39-gipa National Games-ko re·baenggipa 2027 bilsini February aro March jani gisepo, Meghalaya a·doko sokachakgen ine Indian Olympic Association (IOA)-ni seatgipa chittiko, Mongolbar salo a·dok sorkari man·soaha.
Ia chittiko IOA-ni president Dr PT Usha, soi ka·enba, a·dokni Chief Minister Conrad K Sangma-na seataha.
“Meghalaya a·doko kal·susaanirangko namdapatna on·kange kam ka·aniko aro National Games gita dakgipa kal·susaanirangko sokachakna man·aniko nike chang 39-gipa National Games-ko Meghalaya a·doko sokachakna on·na tik ka·angaha,” ine ia chittio IOA-ni president parakataha.
Chang 39-gipa National Games-ko Meghalaya a·doko name sokachakna man·gen ine an·tangni ka·dongchakenganiko parakatengon, ia kal·susaaniko sokachakanio pilak nanga dakchakanirangko on·na gitaba IOA-ni president, ku·rachakaniko on·ataha.
Ia chang 39-gipa National Games-ko sokachakna cholko man·enganiara kal·susaanirango gisik nanggipa a·dokni chadamberangna nambegipa chol ong·enga ine adita salrangna skangsan, a·dokni Sports Minister Shakliar Warjri, ia cholko an·tangtangni namgnina ra·china gita kal·susaanirango gisik nanggipa chadamberangko didiatahachim.
“Kal·susaanirangko namnikgipa chadamberangna sorkari aro anga an·tangba cholrangko on·na rakbee kamko ka·enga aro anga ka·donga uamang, ia cholrangko an·tangtangni namgnina ra·gen,” ine ua aganaha.
Ia 2025 bilsio chang 38-gipa National Games-ko Uttarakhand a·doko sokachakenga indiba 2026 bilsiode India a·songo Asian Games-ko sokachakengani gimin National Games-ko ong·atskajaenga aro uni ja·man 2027 bilsiode chang 39-gipa National Games-ko Meghalaya-o sokachakskana siengahachim.