SHILLONG: Re·baenggipa 2028 bilsini Assembly election-o Voice of the People’s Party (VPP)-ni president aro MLA Ardent Miller Basaiawmoit-na Nongkrem Assembly constituency-ni manderang, ‘Red card’-ko mesokgnok ine Nongkrem constituency-ni MDC aro ia KHADC election-o Independent candidate ong·e susaenggipa Lambor Malngiang a·kangataha.
Re·baenggipa February 21 tariko ong·atenggipa KHADC election-na Smit-o campaign-ko ong·atanio Malngiang, ia kattarangko aganaha.
Batanggimin bilsignini gisepo, VPP-ni president aro Nongkrem constituency-ni MLA Ardent Miller Basaiawmoit, manderangna dakchakanirangko on·na jechakahani a·sel ia constituency-ni manderang bang·en neng·nikanirangko chagrongna nangtokaha ineba Malngiang aganaha.
An·tangko bilo ong·ja ine pa·sikenba, manderangna dakchakanirangko on·na jechakenggipa mandeko MLA seoke maming namgni dongjawa ineba Malngiang aganaha.
“Manderangna dangdike on·na kusi ong·gipa dilgiparangkosa chingna nanga. Ia MDC election-ko uni semi final ine agananikoba angade ong·e nikja. Ia election-kon angade final ine chanenga maina 2028 bilsini Assembly election-ode Nongkrem constituency-ni manderang, VPP-ni MLA-na ‘Red card’-ko mesokgnok,” ine ua aganaha.
Uko MDC seoktaia ong·ode ua manderangna nambate dangdike on·angkuna jotton ka·gen ineba Independent candidate ku·rachakaniko on·angaha.
“Da·o ong·enggipa MLA, jean manderangna pa·sikani kattarangko agansimaia, una bate anga MDC ong·e constituency-ni manderangna nambate dangdike on·na man·a ine mesokgen,” ine Malngiang aganaha.