SHILLONG: Re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-ko tom·tome aro nama bewalo matchotatna man·na gita police-rang, chu·onga gita sipai dolrangko donatenga.
A·dokni Director General of Police (DGP) Idashisha Nongrang-ni kobor ra·timgiparangna parakatani gitade, KHADC aro JHADC election-na police dolrangko ra·dapaha aro ia election-ko tom·tome matchotatna man·na gita pilak biaprangon chel·chakanirangko bariataha.
Election-na kamrangko ka·soanio da·o dipet darang biaprangonikon so·sojengjeng ong·ani ba golmal ong·anirangko knasona man·kujaenga ineba DGP aganaha.
KHADC election-ko tom·tome ong·atna man·na gita East Khasi Hills a·jamangmangnan dolbonga sipairangko donatenga ine adita salrangna skangsan police officer saksa parakatahachim.
“Da·o dipet niam retirangko name rakkina man·enga aro darang biaprangon dakgrik dinggrikani ba golmal ong·anirangko chingna u·iata dongkuja. Election sepangbaroroahaon chinga sipai dolrangko nangani kri dondapatgen,” ine police official saksa aganaha.
Police official-ni parakatani gitade, ia dolbonga sipairango mobile aro tactical patrol dolrangba donggen aro ia sipai dolrangko, East Khasi Hills a·jani pilak polling station-rangon donatgen.
East Khasi Hills a·jao dam 943 polling station-rang gnang aro ianoni dam 34-kode bilgrigipa aro dambongakode kenchakna nangbatgipa polling station-rang ine donaha.
Election-ni somoirango maming a·selrang aro so·sojengjeng ong·anirang dongjana gita walni somoirango aro re·rurae nirok sandianirangko bilakbatataha ineba police official aganaha.
