TURA: Robibar salni bako, Dakopgre Baptist Mondolini dilgiparang, Tura jillani samtangtango dal·drobaenggipa chadamberangni ‘drug’ ba pekatgipa samrangko jakkale an·tangtangni janggi tanganiko ong·siatengani gimin ‘Drug Awareness Program’-ko Dakopgre Community Hall-o ong·atangaha.
Ia awareness program-o Tura-ni Circular Inspector (Sadar) Bitching N Marak aro Counsellor Amesa Chesrame S Sangma, mongsonggipa sokgipa ong·e bakko ra·angenba, pekatgipa samrangko jakkalani namgijanirangko chadamberangna agan-talate on·angaha.
Ia awareness program-ko ong·atanio, Tura-ni CI (Sadar) Bitching Marak, jinmana aganprakengon, drug-ni namgijako nachikolchimangmang knae ra·aigija noktangtango depante demechikrangna agan-talate on·china gita ma·a-paarangko didiangaha.
Tura songjinmao 2010 bilsimangonin chadamberangni ia pekatgipa samrangko jakkalaniko am·sandina a·bachengahaoba ia drug jakkalaniko champengna gita 2019 bilsimango West Garo Hills a·jani Deputy Commissioner Ram Singh, ia drug-ni bidingo Police official saksa, Excise Official saksa, aro Magistrate saksani team-ko tariaha ineba Marak aganaha. Indake 2019 bilsimangonisa Tura songjinmao drug ba ‘Brown Sugar’ gipna a·bachengaha ineba ua aganangaha.
Ia drug jakkalani aro badingsrukaniko champengna gita a·dokni police, Anti Narcotics Task Force (ANTF)-ko bikotenba samtangtango drug jakkalaniko am·sandiangkuenga ine Marak aganenba, ia drug jakkalaniara mandena namgijagipa ong·an baksana tom·tomgipa nokdangkoba rusiaona sokatna man·a ine talataniko on·angaha.
Ia drug-ko jakkalenggipa chadamberang ru·utangahaon noksul aro songsalni bosturangkoba cha·una a·bachenga jean nokdangna rasong be·ani ba kratcha·ataniko ra·baa ineba ua aganaha.
Indake ong·engon, songsalo dongenggipa gimik ma·a parangan detangtangni salantio ka·enggipa kamrangko nirokan baksa namgija ramaona re·angengako u·iahaon uamangko agan-skie ra·china gitaba Marak mol·molangaha.
Ia tom·anio, Counsellor Amesa Chesrame S Sangma-ba jinmana aganprakengon, chadamberang ia drugs-ko jakkalna a·bachengahaon ianoni an·pilna man·rongja ine janapangenba ia pekatgipa bosturangko jakkalgija chel·e dongon dal·drobaenggipa chadamberangna nambatgipa baseani ong·a ine talatangaha.
Ia drug-ko jakkalna a·bachengahaon jakkalani bidingo gadang donga jean mandeko ia drug-ni gimin cha·suatna man·a aro ia drug mandeko ka·sin ka·sin ong·siatna man·an baksa gisikni chanchianiko ba amikbrang ong·atna man·a ineba ua talataniko on·angaha.
