SHILLONG: Meghalaya a·doko, mongsongbate Khasi aro Jaintia Hills a·jarango dingtang dingtang dolrang, niam gri napsrukanirangna kenchakenba, Byrnihat-ona kilometer 2 ong·gipa rel ramako tarina on·tokjaengon, Assam a·dokni Nogaon a·jao donggipa Chaparmukh-oni Jowai-ona rel ramako tariskana Northeast Frontier Railway (NFR) miksongskaenga.
Koborko man·soani gitade, Assam a·doko donggipa Chaparmukh junction-oni Meghalaya a·dokni Jowai-ona kilometer 180 ong·gipa rel ramako tarianiba salgro salaram a·dokrango rel ramarangko namdapatanio mongsonggipa bak ong·enga.
Ia rel ramara, mongsonggipa biaprang, jekai Bhoksong, Rajagaon, Baithalangso, Jengkha, Kherani, aro Umrangso-ko nappakenba Jowai-o bon·egen.
Kobor on·timgiparangni u·iatani gitade, ia rel ramaan, Assam aro Meghalaya a·dokni gisepo re·a doani cholrangko namdapatanio mingsa mongsonggipa ramaba ong·gen.
Ia rel ramani bidingo koborrangko man·soengoba, bang·bata rel project-rangan chu·sokna man·jaengani gimin ia project-ni bidingo NFR-ni official-rang, mamingkoba parakna jechaktokaha.
A·dokona rel garirangko ra·napbaahaode niam gri napsrukanirangko champengna man·jawaha ine kenchakenba dingtang dingtang dolrang, a·dokona rel gari ra·napbaaniko raken jegaltokengachim.
A·dokona rel garirangko ra·bana skang, niam gri napsrukanirangko champengna gita Inner Line Permit (ILP) gita bilakgipa niamrangko ra·gatchengchina dingtang dingtang dolrang dabitokengachim.
Shillong songjinmaona rel gari ra·baaniko jegaltokengani gimin a·dok sorkari, koela gapgipa Jaintia Hills a·jaonaba rel ramako taribana miksongengachim indiba da·alonan ia pilak project-rangan chu·sokgipa ong·na man·skakujaenga.