RESUBELPARA: Meghalaya a·doko jatsa jatgipin baksa meli nangrime aro ku·cholsan ong·e re·mikkanganiko namdapatna gita February 17 tarikoni February 21 tarikona Tripura a·dokni manderang baksa jatni changa sapaniko, daka rikaniko, aro uandake dingtang dingtang u·i-ma·sie skie ra·aniko dakna gita Inter State Youth Exchange Program-ko North Garo Hills a·jani Mendipathar Multi Purpose Hall-o a·bachengatangaha.
Ia Youth Exchange programme-ko ong·atanio bak ra·na gita Tripura a·dokoni sak 27 delegate-rang Escorting Officer-rang baksa North Garo Hills a·jani Mendipathar-ona sokbatokaha.
Ia programme-ona mongsonggipa ong·e sokgipa North Garo Hills a·jani Additional Deputy Commissioner (ADC), TR Marak, jinmana aganprakengon, iandakgipa program-rangko ong·atanichi a·doko dal·drobaenggipa chadamberang, jatsa jatgipinni daka rikaniko skie ra·na man·a aro an·tangtangni re·mikkanganio bang·a namdapaniko ba dingtanganiko ra·bana man·gen ine janapangaha.
Una agreba, ia program-o Nehru Yuva Kendra William Nagar-ni Deputy Director, LB K Sangma-ba jinmana aganprakengon, ia program-ko East Garo Hills a·jani Nehru Yuva Kendra, India sorkarini Youth Affairs & Sports Ministry-ni ning·o, Meghalaya aro Tripura a·dokni gisepo jatni daka rikanirangko skie ra·grikna aro mesokna ong·atenga ine talataniko on·angaha.
Una agre, ia programme-o bak ra·enba, nama ku·pattianiko ong·anggipa gipin manderangara, North Garo Hills a·jani Deputy Superintendent of Police (DSP) JCA Sangma, MMCS-ni Secretary Sister Rose Kayathinkara, Tripura-ni Escorting Officer Liton Shil aro gipinrang ong·a.
Ia sal 5-na State Youth Exchange Programme-ko ong·atanio, Garo Hills-o donggipa dingtang dingtang jatrangni daka rikani, bading chiwalanirangkon tang·doatani, National Human Rights Commission & Legal Services, Cyber Crimes & Cyber Security, Drug aro uandake gipin pekatgipa bosturangko jakkalani bidingo mikrakatani aro uandakgipa dingtang dingtang katta bichongrangni bidingo, a·dok damgnini chadamberangna agan-talatanirangko on·anggen.
