TURA: South Garo Hills a·jani Gasuapara C&RD Block ning·o donggipa Chirengpara aro Makaburi songrango Jal Jeevan Mission (JJM)-ni kamrangko matchotgija galchipa ine A·chik Dedicated Integrity Leaders (ADIL) Gasuapara regional unit parakataha.
ADIL Gasuapara regional unit-ni president S Salgra G Momin-ni parakatani gitade, ia song damgnina JJM-ni chirangko sokate on·na gita gong 1,38,62,100 tangkarangko hisape donahachim aro ia kamrangko 2022 bilsini gisepon matchote on·ani ong·achim. Indake ong·genchimoba, ia song damgnion JJM-ni kamrangko matchotgija galchipahani a·sel songni nokni manderang neng·nikanirangko chagrongna nangtokenga ine Momin parakataha.
“Ia song damgnini JJM project-ko saksa A Khonglam minggipa contractor man·ahachim indiba ia project-ko matchotgija galchipahani a·sel songni nokni manderang ringani chirangna dilna nangtokenga. Ian contractor-ni kamna gisiko nanggijaniko aro kamtangko chu·sokatna gisiko nanggijaniko mesokani ong·a,” ine ADIL Gasuapara regional unit-ni president parakataha.
Ia song damgnini JJM project-ko ta·raken jako ra·e kamrangko matchotatchina didiatengon, ia contractor-ni kosako nanga gita ja·kurangko de·chinaba ADIL Gasuapara regional unit, a·dok sorkariko aro PHE official-rangko didiataha.
