TURA: Garo Hills Autonomous District Council (GHADC)-o dingtang electoral roll-ko tarina pilak nanga kamrangko ka·engaha ine GHADC-ni Chief Executive Membor (CEM) Albinush R Marak, ku·rachakaniko on·ataha.
Bristibar salo, A·chik Conscious Holistically Integrated Krima (ACHIK) dolni dilgiparang, uko gronge, GHADC-na dingtang electoral roll-ko tariani bidingo agangrikeanio CEM ku·rachakaniko on·ataha.
ACHIK dolko dilenggipa manderangni parakatani gitade, GHADC-na dingtang electoral roll-ko tarina nangengani gimin agangrikon, dingtang electoral roll-ko tarina gita uamang man·a dipet ta·raken kamrangko ka·engaha aro iana dingtangmancha Expert Committee-ko songe on·na kamko ka·enga ine GHADC-ni CEM Albinush Marak, ku·rachakaniko on·ataha.
Ua an·tangni CEM ong·engmiting somoion ia kamko matchotatna jotton ka·enga ineba Marak, ACHIK dolni dilgiparangna ku·rachakaniko on·ataha.
Bangladesh, Assam aro uandakgipa dingtang dingtang biaprangoni niam gri re·napbae Garo Hills-o songdong a·chatokengani giminba ACHIK dolni dilgiparang, GHADC-ni CEM baksa agangrikangaha ine u·iataha.
“Gipin biaprangoni niam gri re·napbae Garo Hills-o songdong a·chaengani gimin agangrikon, iandake niam gri re·napbae songdong a·chaenggipa manderangko apsan ku·cholsan ong·e champengna nanggen ine CEM, chingna aganaha. Uni gimin chinga ACHIK dolni gita, gipin biaprangoni Garo Hills-ona niam gri re·napbae songdong a·chaenggipa manderangko champengna sorkari aro dingtang dingtang dolrang baksa bakrime kamko ka·gen,” ine ACHIK dolni dilgiparang parakataha.
