TURA: Sukrobar salo, North Eastern Hill University (NEHU) Tura Campus-ni ning·o donggipa Garo Department, Tura-ni A·chik Literature Society (ALS) baksa nangrime, International Mother Language Day-ko manidilangaha aro ia salko manianio, NEHU Tura Campus-ni chatro chatrirang, skigiparang, sea jotanio gisik nanggipa manderang aro ALS-ni membor-rangba bak ra·angtokaha.
Ia salko maniani bak gita program-ko ong·atanio, Garo department-ni Head, Dr Jacqueline R Marak, jinmana aganprakangengon, ia bilsio International Mothers Day-ko maniani bilsi 25 gapengaha aro ia salko Bangladesh a·songosa February 21 tariko manichengaha ine parakataha.
Ia salara ma·ani ku·tangko mande ra·na ka·sana aro ripinge rakkina gita manienggipa sal ong·a ineba Dr Marak aganaha.
Ia program-ko ong·atanio, Garo Department-o poraianggipa gitcham chatro chatrirangni on·gilatgipa ming 50 poedorangko chapa ka·gipa Chokchimsa Bite-ni bidingo Prof Fameline K Marak, jinmana talate on·angskaaha.
Ia program-ko ong·atanio, dongpae jinmana aganprakanggipa aro bak ra·gipa gipin manderangara, Dr Dokatchi Ch Marak, ALS-ni Secretary Dr Crystal Cornelious D Marak, Melkior Ch Sangma, Gripseng G Momin aro gipinrang ong·a.
