SHILLONG: University of Science and Technology Meghalaya (USTM)-ni chancellor Mahbulbul Hoque-ko police rim·ani bidingo Meghalaya sorkari maming kattako agana dongkujaenga.
A·dokni saksamangba minister-rang iani bidingo mamingkon aganjaenga. Chief Minister Conrad Sangma-ba jrip dongenga. University of Science and Technology Meghalaya (USTM)-ni on·gipa degree-rang nokli ong·a ine Assam-ni Chief Minister Himanta Biswa Sarma-ni matnangako, kakket ong·ja ine jechakatani ja·man USTM-ni chancellor-ko rim·aha.
Minister-rang iani bidingo mamingkon aganna jechakengon Education Department, “ia mamla Assam-nisa ong·a, Meghalaya sorkari iano maming bak nangeja’ ine aganaha.
“USTM-ni chancellor-ko uni nokoniko rim·aha. Ian Assam-ni mamlasa ong·a, Meghalaya maming bak nangeja.”
Minggipin Meghalaya BJP, Assam-ni Chief Minister Sarma-ni matnangana chakengon, Meghalaya sorkariko, institute-ko private-ma government institute ong·a, iako talatchina ba parakchina aganaha. Assam-ni CM Sarma, batanggimin somoirangonin USTM-ni chancellor-ko dingtang dingtang mamlarango matnangaha. Indiba Haque-ni uni kosako matnangako kakket ong·ja ine jechakaha.
