SHILLONG: Adita salrangna skang ong·atanggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o pu·onanirangko da·al Sombar salni bako chanengahaon, KHADC election-o pu·onanirang pipraaha indiba ia election-o National People’s Party (NPP) seat-rangko bang·bate cheani cholrang donga ine kobor on·timgiparang parakataha.
Kobor on·timgiparangni u·iatani gitade, KHADC election-o NPP, Nongthymmai, Jirang, Umsning, Rambrai-Jyrngam, Nongshken, Nongpoh, Langkyrdem-Laitkroh, Laitumkhrah-Malki, Mawsynram, Nongstoin aro Mawhati seat-rangko man·chape gimik dam 11 MDC constituency-rangko chenaba gnang ine ka·dongenga.
Ia KHADC election-o United Democratic Party (UDP)-ba, Shella, Sohra, Langrin, Mawphlang-Diengiei, Sohiong-Nongspung, Mairang, Mawkyrwat aro Jaiaw seat-rangko man·chape gimik damchet constituency-rangko chena ka·dongenga ine kobor on·timgiparang u·iataha.
Indake ong·engon, ia election-o Voice of the People’s Party (VPP)-ba Mawkynrew, Mylliem, Mawlai, Pariong-Mawthadraishan, aro Sohryngkham seat-rangko man·chape gimik dambonga constituency-rangko chena ka·dongenga indiba Nongkrem constituency-ode VPP, da·o ong·enggipa MDC aro Independent candidate Lambor Malngiang baksa bilakbee susagrikna nangenga ine kobor on·timgiparang parakataha.
Kobor on·timgiparangni u·iatani gitade, ia KHADC election-o VPP-ni dilgiparang, komibeoba dam 15-oni dam 20 seat-rangko chena ka·dongskaenga.
Mawshynrut constituency-ko Hill State People’s Democratic Party (HSPDP) aro Mawkhar-Pynthorumkhrah constituency-ko Congress chenaba gnang ine kobor on·timgiparang u·iatskaaha.
Laban-Mawprem aro Umroi constituency-rangkode Independent candidate-rang cheskaani cholrang donga ineba kobor on·timgiparang parakataha.
Indake ong·genchimoba ia pilakkon da·al salni bako vote-rangko channani ja·man result-rangko parakatahaosa kakketkode ma·sina man·aignok.
