TURA: East Garo Hills a·jani Rongjeng Civil Sub-Division office-ko matchotate on·na ku·rachakahaoba aro tangka paisarangko chame on·ahaoba, kamrang ka·sindugaengani a·sel da·onan ia office-ko rika matchotkujaenga ine Rongjeng jolo donggipa dingtang dingtang dolrang, chong·motan NGCO, ACFI, APA, GSMC, ADIL, ASWA, AAYF, GSU, AOSW aro FKJGP matnangatenba, iani bidingo a·dokni Chief Minister Conrad K Sangma-na sedoataha.
Iani bidingo a·dokni Chief Minister-na an·tangtangni suk ong·gijaniko seachi parakatengon, Rongjeng Civil Sub-Division office-ko rikani kamrang ka·sinengani a·sel jolo songdongenggipa manderang neng·nikanirangko chagrongna nangtokenga aro ia jolrango namroro silroroaniko ja·donggaatani gita ong·enga ine NGO-rang parakataha.
Rongjeng jolo songdongenggipa manderangni namgnina ia office nokko ta·raken riktaichina aro kamrangko ta·rake matchotatchina gitaba Rongjeng-ni NGO-rang, a·dokni Chief Minister-ko didiataha.
Iana agreba, Rongjeng-o Sub-Divisional Civil Hospital rikaniko ta·rakatchina aro Rongjeng Degree Model College-na full fledged principal-ko songe on·china gitaba Rongjeng jolni NGO-rang, Chief Minister-na sedoatgipa chittio gisik ra·attaianiko on·angaha.