SHILLONG: Meghalaya a·doko ru·utbea bilsirangna sason ka·gipa Congress dol, ia chang Khasi Hills Autonomous District Council (KHADC) election-o seat ge·sakoba cherikna man·jaha indiba Jaintia Hills Autonomous District Council (JHADC)-ode seat damgittamko cherikpana man·aha.
District Council election-o chu·sokpana man·jahaoba, party-ni dilgiparang, kam ka·giparangkode mittelpilangskaaha.
KHADC aro JHADC election-ni result-rangko parakatani ja·man, Meghalaya Pradesh Congress Committee (MPCC)-ni president Vincent Pala, kobor ra·timgipa manderang baksa agangrikengon, ia bilsini district council election-o uamang chu·sokgipa ong·na man·jahaoba, Congress dolna chakpaanirangko on·enggiparangna aro nama skanirangko on·atgipa pilaknan uamang mittelpilaniko on·na ska ine parakataha.
KHADC aro JHADC election-o susagipa Congress dolni pilak candidate-rangko mittelpilangskaengon, songadam nokarango manderangna kamrangko ka·angkuna, manderangni bilrangko chel·chakna aro Meghalaya a·dokni pilak biaprangonan namroro silroroani sokchina gita Congress dol rakbee kamrangko ka·angkugen ine MPCC-ni president parakataha.
