SHILLONG: Ding·a batroroengani a·sel Meghalaya a·doko tipangenggipa dam 741 chiring chibisikrangko tangatpilna a·dok sorkari ja·kurangko de·enga ine Mongolbar salo, a·dokni PHE Minister Marcuise N Marak parakataha.
Iani bidingo kobor ra·timgipa manderangna talatanirangko on·angengon, a·gilsako ding·ani batroroengani a·sel chiring chibisikrang tipangenga ine Marak aganaha.
“A·gilsakni pilak biaprangon ding·ani batroroenganiko nikna man·eng aro re·anggipa February 18 aro 19 tarikosan chinga Udaipur-o gnigipa changna ong·atanggipa All India Water Ministers Conference-o bak ra·angaha, jeon pilak minister-rangni ia apsan obostani bidingo agananiko anga knabana man·aha. Ding·a batroroengani a·sel an·chingni chiring chibisikrangna nangchakeaniko ra·baenga indiba chinga ia chiring chibisikrangko tangatpilna kamrangko ka·enga. Chinga chiring chibisikrangkosan ong·aigija pokkri aro chibolrangkoba tangatpilna ja·kurangko de·enga aro bilsigni ja·man an·ching biterangko nikna man·gen,” ine PHE Minister Marak aganaha.
A·doko mongsonggipa dam 741 chiring chibisikrangko department-ni gita sandimanaha ine janapatengon, “Chief Minister Conrad K Sangma-ni dilanichi a·doko climate council-ko songaha aro ia council-an, tipangenggipa chiring chibisik aro chibolrangko tangatpilna ja·kurangko de·gen ine tik ka·aha,” ine Marak aganaha.
PHE Minister-ni parakatani gitade, iandake chiring chibisik aro chibolrangni tipangengani a·selan Jal Jeevan Mission (JJM)-ni kamrangko ka·anioba neng·nikanirangko chagrongna nangenga.
“Je songrangon JJM-ni chirangko man·jaengachim, ia pilakon chiring chibisik aro chibolrangni tipangengani a·selan ong·enga. Ia pilaknan chinga ja·kurangko de·enga,” ine Marak aganaha.
Garo Hills-o aro Khasi Hills-ni mitam bakrango a·ba o·e cha·kuengani a·selan chiring chibisik aro chibolrang tiproroangenga ineba Marak aganaha.
‘Catch the Rain When it Falls’ ba ‘Mikka waani somoion chiko chimongrikbo’ ine sorkarini dongimin pangchakani bidingo janapatengon, ia apsan pangchakanikon sorkari ja·rikenga aro chiring chibisikrangko tangatpilna jotton ka·enga ine PHE Minister parakataha.